President Joe Biden chuan United States sorkarin lirthei 6,50,000 chuang a neih chu boruak leh khuarel tichhe tlem zawk, electric motor hmanga thlak vek a tum.
“Sorkar laipui ringawt pawhin lirthei tam tak a nei a, hengte hi thil tichhe tlem zawk lirthei, America-a American-te siam hmanga thlak tum mek a ni,” tiin Biden-a hian Thawhtanni khan a sawi.
Biden-a hian dan awm sa, sorkarin lirthei a lei dawna ‘US siam’ tih ngei ngai chu sawiin American ni lote pawhin hlawkna an neih theihna kawng hawn a duh.
Biden-a chuan lirthei part pawimawh – engine, steel, darthlalang leh a dangte pawh, US siama hman theih turin a ti.
White House chuan president-in electric lirthei hmanga sorkar lirtheite thlak tura a tih hi eng tikah nge tih zawhna chu a chhang lo va. Thlak vek tur chuan US $ tluklehding 20 leh a aia tam mah sen a ngai ang.
Thawhtanni khan Biden-a hian ‘Buy America’ tia an sawi, an ram siam ngei thil leina tur executive order a ziah chuan electric vehicle lirthei lei kher a kawk lo.
A campaign lai khan Biden-a hian sorkar laipui chuan thil thianghlim zawk nen sorkar laipui, state, tribal, postal leh tual chhung mite pawhin electric lirthei an hman nan hma a lak tur thu a lo sawi tawh.
American auto industry, tual chhunga lirthei hralh velna, a siamna, a part buaipuina atanga electric vehicle charging station thlengin hna maktaduai khat siam belh a lo tiam tawh bawk.