Aizawl: Mizoram Larsap Hari Babu Kambhampati leh fisheries department hotute chu nimin khan Raj Bhavan-ah an inkawm a, Mizoramah sangha khawi leh a kaihhnawiha eizawng chhungkaw 16,588 vel an awm thu leh nikum khan sangha metric tonne 4,575 thar chhuah a ni tih tar lan a ni.
He an inkawmnaa fisheries department hotuten an tar lan danin Mizoramin kum khatah sangha metric tonne 13,000 vel thar chhuah a mamawh nia chhut a ni a, hetihlai hian nikum khan sangha metric tone 4,575 vel chauh a thar a ni.
Mizoramah sangha khawi leh a chi siamna kaihhnawih thila inhnamhnawih nia ngaih chhungkaw 16,588 vel an awm a, chung zinga chungkaw 6,283-te chu sangha manin ei an zawng a, chhungkaw 11,204 chu fisheries huanga eizawng nia chhut a ni a. Chhungkaw 30,150 vel hian fishery sector atangin sum an lalut niin chhut a ni bawk a ni.
Fisheries department hotute kawmtu larsap chuan Mizoramin kum chanve chhunga sangha ei tur bak a la thar lo chu tan lak leh zual a ngai tih leh Mizoram mipui ei khawp tal chu tun atanga kum hnih, kum thumah chuan thar chhuah a ngai tih a sawi.
Sangha khawi chu eizawnna hlawk a nihziate kuthnathawktu tam zawkin an hriat theih nana tan la turin thawktute a chah a, sangha khawitena bul tanna atana an mamawh sum hlawm te, bank loan anga lak theih dan kawngte dapsak tur leh hemi chungchangte bank official-te nena sawiho turin fisheries hotute chu thurawn a pe bawk.
Inkawm honaah hian fisheries department hotuten an department hmalakna kal mek leh blue economy – lui luang, dil, tuikhuah leh a dangte fisheries kaihhnawih eizawnna atana siam tura hmalakna kal mekte PowerPoint hmangin an tar lang a ni.