Rural development ministry-in ni 100 inhlawhfakna tia sawi, Mahatma Gandhi National Rural Employment Guarante Act (MGNREGA) hnuaia state tinte ni khat hlawh zat tur thar a tichhuak a, Mizoram-ah chuan ni khat hlawh Rs. 249 a ni dawn.
Rural development ministry chuan March 24, 2023 khan state tinte hman tur MGNREGA hnuaia inhlawhna rate thar hi a tichhuak a, rate tharah chuan Mizorama job card holder-te ni khat hlawh tur chu Rs. 249 a ni a, sorkar kum thar, April 1, 2023 atanga hman nghal tura tih niin Mizorama rate hman lai chu ni khatah Rs. 233 a ni a, rate thar hi Rs 16-in a sang zawk a ni.
Hmarchhak state zingah Arunachal Pradesh leh Nagaland chu ni khat rate tlem berna niin Rs. 224 a ni dawn a, ni khat hlawh tam berna chu Sikkim-a panchayat pathum bikah niin, Rs. 354 an hlawh dawn.
Rural development ministry website-a tar lan a nih danin kumin March 27 thleng khan Mizoramah MGNREGA hnuaiah job card 2,13,745 a awm mek a, job card nei tamna ber chu Lawngtlai district niin 36,751 a awm a, a nei tlem ber Hnahthial district-ah 7,159 a awm thung.