Aizawl : MNF Adviser Dr R Lalthangliana chuan Mizoram hi chhe lai let der anga sawia, a beidawng zawng hlira mipuiah zirtirna pea kalphung thar zuartute kal dan chu tha a tih loh thu a sawi.
Nimina LMC inthlan lo awm tura Venghlun leh Salem, Lunglawn-a campaign office-te a tlawhnaah Dr R Lalthangliana’n ZPM chungchang a sawina ni ngeia ngaih theih tur thu sawiin, sorkarna la chelh ve ngai reng reng lo, sorkar kalphung leh ram hruai dan pawh la tem chhin ve lo te’n Congress, PC leh MNF sorkar kal tawh leh sorkar lai te, an thil tih that lai sawi duh si loa a chhe lai sawi reng maite hi tha a tih loh thu a sawi a. Budget pawh la khawih ve ngai reng reng lote’n LMC lo piang tur thil lian tham hi kalpui ngaihna an hriat loh tur thu a sawi.
MNF sorkarin LMC a dinah hian state sorkar nen, rorellai MLA-te leh LMC member tharte nen inlaichinna tha tak neia Lunglei khawpui nasa taka tihhmasawn dan ngaihtuah a nih thu sawiin Dr R Lalthangliana hian, “MNF LMC a pian chuan model LMC din a ni ang,” a ti.
Lunglei mipuiin kum 20 tel tlumtea thlira an thlir MZU Southern Campus pawh hmanni lawka Delhi a zin tumin sorkar laipui hotute a sawipui nawn leh a, a fel thuai dawn niin a sawi a. Lunglei by-pass road atan cheng vaibelchhe tam tak ruahmanna an siam tawh thu leh, NHIDCL hnenah tender pek tawh niin MoRTH chuan DPR a chhuah tawh chu a sawi nawn leh a. Tui lama harsatna lian tak awm thin sutkian nan tui in tur thianghlim Lunglei mipuiten an neih theih nan project lian tak an siam tawh thu a sawi bawk.