Thineih a tawp tih i hriat atanga chawlhkar 40 chho velah hian a tlangpuii nau neih hi a intan thin a, a nih loh paw’n- chhula naute awm atanga kar 38-naah hian nau neih hi a hun thin tiin a sawi theih bawk ang. I thineih hnuhnun ber i hriatin emaw i ruak ta lo tih i hriatin emaw (thenkhat chuan an hre thei tlat), thineih mumal loh vang emawte’n nau neih hun tur hi a rin hriat theih thin.
Last Menstrual Period (LMP) behchhanin:
Thi neih a mumal lova, ni 28 dan-a nei i nih chuan nau neih hun tlangpui thla 9 leh ni 7 hi i thineih ni hnuhnung ber (LMP) khan belh rawh.
Entirnan, June 5-ah thi i neih tawh loh chuan expected due date (EDD) an tih mai, hun pui lo thleng tur hian a kum leh March 12 chho vel a ngai dawn tihna a ni.
Chhul rinchhanin:
I thineih hunbi hi a tlangpuii 28 danah a niha, i ruak tawh lo ti i hriat chuan hunpui lo thleng tur chu – ni 7 paiha thla 9 dang belh mai tur a ni. Amaherawh chu, 100% a dik thlap a tihtheih loh.
Chhul inkeu laia vawikhat tal emaw sex hmang lo hi an awm fo mai a, chumi avangte chuan he chhiar kawp hi hun rang-kachak hre fuh lo tan chuan a dik loh theihna chen a awm ve tlat a ni.
Doctor-in a hriat dan
Pum enchianna atangin- Thla tin-a i va in entir a piang khan Doctor chuan i pum (dul) a enfiah fo thin anga.
Chuta a en tlangpui chu dul len zawng leh naute thanlen dan kha a ni. Amaherawhchu, hei pawh hi nau neih ni tur dik tak hrilhlawkna tur atan chuan a dik ber lo thei thova, LMP emaw ruak lo tih inhriatna atang bawka en thin a nih vang a ni.
Entirnan: A chang chuan LMP hian Nov 21-a nei tur angin a tarlang thin, mahse dul enfiahna atangin doctor chuan naute hi a thang chak viau emaw dul a len viau chuan nau neih hun tur hi a hma 5-10 (chu aia tam pawh a ni thei) a nih loh vek paw’n Nov 15 velah nei tur angin a hrilh thei tho che a ni.
Ultrasound Scan atangin:
Hemi hmang hian doctor chuan naute thanlen dan te hmu theiin chuta tang chuan a hun leh ni tur an sawi lawk thei a. He enchhinna hi thil dang zawng aiin a rintlak a, a chhan chu – doctor hian naute taksa inrelbawl dan leh a lengzawng chiang taka a hmuh theih thin vang a ni.
Ultrasound-a endik a nih chuan a hma lam aiin a hnu lam result khan ni ropui lo thleng tur chu a hrilhlawk dik thei zawk a. Engpawhchunise, a ni tur chiah sawi dik chat chat hi thil harsa tak a nih laiin a bawr chho vel erawh a rin hriat theih thin.
Tehfung a zirin a hun hi a danglam thei em?
Thei teh meuh mai. He-tianga tih dan (method) hrang hrang hian a hun leh ni tur hi sawi thei nawk nawk mahse, a chang chuan ni tam takte a tla zep thei thova. thineih a mumal loh viau a, a chang leh rei tak a chang leh rei lo te- ang chite a nih chuan LMP tehfung hi a dik thei dawn lova, hetiangah hi chuan Ultrasound bawk kha a rin tlak.
Hun ruat bik deuhah neih tum ta ila a theih em?
Theih e. Eng ni bikah emaw nau nei turin ruahmanna i siam thei. Nimahsela, i hriattur chu – thineih hunbi leh chhul atanga chi chhuah hun a intawngfuh (thawh dun) a ngai dawn a. Engemaw ni bika nau neih i duh chuan a neih tur ni awm atanga chawlhkar 30 paih tur a ni.
Ni leh thla angin sawi dawn ila,a fiah zawk awm e. Nau i neih tur ni ni-a i hriat kha pasarih-in pun tir la, chuta tang chuan thla 9 paih rawh.