Mexico hmar lam, US nena an inrina bul lawka ram dang atanga lutte an dah khawmna hmuna kangmei chhuakah mi thahnem tak an thi.
Kangmei hi Thawhtanni zan tlai tawh taka Ciudad Juarez, El Paso, Texas nena an inrina bul lawka chhuak a ni.
Thlalak thehdarhah chuan ambulance, kang thelhtu te leh van-a ruang an hlang lut bakah mei khu chuai chuai te, khawlaia ruang thenkhat, puan tlea khuh te pawh hmuh tur a awm.
Kangmei chhuakah hian mi 39 vel an thi nia sawi a nia sawi a ni a. Hliam tuar mi 29 chu damdawi inah dah luh an ni bawk tih Mexico-a National Immigration Institute thuchhuahah tar lan a ni a. A hmunah hian Central leh South America-a lut mipa 68 an awm mek niin an sawi bawk.
Mexico-a attorney general pisa chuan chhui zui nghalin a chhuitute pawhin a hmun hi an thutchilh nghal niin chanchinbute chuan an tar lang.
Venezuelan nu pakhat, Vinagly-i chu immigration centre tualah hian lungchhe taka dingin a pasal kum 27 mi chu he hmunah hian hren ve a nih thu leh a chanchin a ngaihchan thu a sawi.
“Ambulance-in an phur tawh,” tiin AFP news agency a hrilh a. “Immigration thuneituten engmah min hrilh lo va. Kan chhungte an thi ve thei a, engmah min hrilh si lo,” a ti.
Ciudad Juarez hi United States luh tumten ramri an kânna khân ber a ni a. Awmna an neihte chu a khat reng a, pemte hian ramri an kân theih hun remchang an dap reng a, thenkhat chuan US sorkar hnenah inhumhim an dil a, an dilna chhanna an nghak hlawm bawk.
US-a President Joe Biden-a sorkar hian mihringa sumdawng thinten kawng hlauhawm tak zawhpuia an rama mi an luhpui nasa lutuk chu tihtlem tumin tan a la nasa hle.
February khan Biden-a hian an rama inhumhimna dilte zawm tur dan khauh zawk a siam a, hei hian Covid-19 avanga inkhuahkhirhna hlih a nih hnua chhim lam ramri atanga lut nasa lutuk a tihziaawm theih a beisei.
Dan tharah chuan ramri thleng, awlsam taka United States-a lutte chu hum an ni thei tawh dawn lo va. Hum an duh a nih chuan an thlenna hmasa ram atangin dilna thehlutin pawm an nih chuan ramri an kân thei dawn chauh va, online hmangin US sorkar app atanga dil theih a ni bawk.
Mexico atanga US-a luh tum hi thla tin mi 200,000 chuang an awm ziah a. A tam ber hi Central leh South America atang niin heng ramah hian retheihna leh tharum thawhna a nasat avangin US-a khawsak theih inbeiseiin an pan thin.
International Organization for Migration-in tun hnaia report a tihchhuahah kum 2014 atang khan US-a luh tuma chhuak mi 7,661 chuang kawngah an thi niin a tar lang a, mi 988 chu mihring khawsakna chi loh hmun an kalna kawngah an hnuhma hmuh zui turin an awm lo zui bawk.