Silchar Central Jail, Assam-a tang mek mi panga chuan HIV an vei tih hmuh chhuah a ni.
Tan in Superintendent Satyendra Baisya chuan an tan hun tur tihfel tawh pahnih leh an thubuai ngaihtuah mek pathum chuan hri an kai tih finfiah a nih thu a sawi a. Mi dang tangte erawh chuan tan ina tang mekte endik tura tihna hi tha takin an paltlang tih a sawi.
Tun thla tir lamah khan Nagaon district-ah pawh thubuai ngaihtuah mi 88 chuan HIV an vei tih hmuh chhuah tawh a ni a. Assam-ah hian thuneitute chuan lung in tang zawng zawngte chu HIV an vei leh vei loh endik vek turin a ti a ni.
Silchar Central Jail-a tan hun tur tihfel tawh pahnih zinga pakhat hi Manipur-a cheng niin pakhat hi truck driver a nih thu Baisya chuan a sawi.
“Truck driver-te hian invenna lam hi an ngaihthah hle thin a, heta lo tang ve pawh hian HIV a lo vei reng a. A dang pakhat zawk, Manipur lam mi pawh hian truck driver nen hian invenna hmang lovin an khawsa dun niin a sawi,” tiin Baisya chuan a sawi.
Thubuai ngaihtuah mek mi pathum, HIV an kai tih hriatte hi chu ruihhlo ngai an ni a, inchiuna hriau inhmantawm thin an ni.
“An pathum zinga pahnih hi Silchar Medical College & Hospital-ah thawn nghal an ni nghe nghe,” tiin Baisya chuan a sawi.
Cachar district-a health service joint director Ashutosh Barman chuan mi tang zinga HIV kai tih hriat zinga pahnih hi Silchar Medical College & Hospital-ah antiretroviral therapy (ART) la tura tih an ni tih a sawi.
“AIDS control body kan nei a, an hriselna an enthla zui zel dawn a. Team-in Silchar Central Jail hi thla ruk dan zelah tlawhin an endik vek zel a ni,” a ti a. Tuna hri kai hmun pangate pawh mi tang dangte hnaih lo tura dan hran an ni dawn tih a sawi.
Social activist Tuhina Biswas pawhin Silchar Central Jail hi tlawh thinin tan in chhung chu hriselna lam atan a tha lo hle tih a sawi a. “HIV kaite chuan awm hran an mamawh hmasa ber a, chu chu Silchar Central Jail-ah hian a theih loh va, district thuneitute pawh tan in chhunga invawn hriselna lam ngaihtuah turin ka ngen tawh,” a ti.