Aizawl : Ni hnih awh tur National Conference on Tourism in Mission Mode chu nimin khan New Delhi-ah neih tan a ni a, Tourism Minister Robert Romawia Royte pawh he hunah a tel.
Conference ah hian Union Tourism Minister G Kishan Reddy leh Union Minister of State for Tourism Ajay Bhatt leh Sripad Naik te bakah State Tourism Minister hrang hrang te leh Tourism Industry-a mi pawimawh dangte an tel.
He hunah hian Robert Romawia Royte chuan Mizoram-in Responsible Tourism Policy 2020 a lo neih tawh hmanga responsible & sustainable tourism chu thingtlang khaw hrang hrangah kalpui a nih mek thu te, Ministry atanga tourism infrastructure development hrang hrang te hmangin Mizoramah nasa zawka tourism hmasawnna kalpui mek a nih thu te sawiin, Tourism Department chuan mirethei te thleng phak hmasawnna a neih a ngaih thu te a sawi.
Tourism Minister chuan Ministry of Tourism-in tourism hmasawnna Mission Mode a kalpui a tum thu chu lawmawm a tih thu sawiin, “Tourism chuan tum leh hmathlir felfai tak nei chunga a kal chuan ram leh mipui ten hlawk zawkin tourism hmasawnna an chhawr thei ang,” a ti.
Tourism Department hian Best Innovative Practices under Swadesh Darshan-ah Thenzawl Golf Course Cafeteria chuan Runner Up lawmman a dawng bawk a ni.
Tourism Minister hi V. Lalengmawia, Joint Secretary, Tourism Department-in a tawiawm a ni.