North Vanlaiphai Joint Action Committee huaihawtin nimin khan an khua atanga Block Agriculture Office (BAO) sawn chhuah duh loh lantirin total bandh an huaihawt a. Nimin vek khan North Vanlaiphaia MNF Unit panga hruaituten Aizawl-a Mizo Hnam Run-ah seal an theh lut.
North Vanlaiphaia VC leh tlawmngai pawl hrang hrang intelkhawm, North Vanlaiphai JAC bultumin, Mizoram sorkarin January 31, 2023-a BAO an khua atanga E. Lungdar-a sawnna thuchhuah a lo siam tawh sut tura vawi eng emaw zat an lo ngen tawh chu tihhlawhtlinsak an nih loh avanga lungawi lohna lantirin kawngzawhte an huaihawt hnuah nimin khan total bandh an huaihawt leh a ni.
Total bandh hi zing dar 6 atanga neih tan a ni a, mipuiin an thlawp that avangin chhun dar 1 khan hlih a ni a. Total bandh neih chhung hian sumdawng dawr leh sikul bakah pisa zawng zawng khar a ni a, khawlaia duty bak pawn chhuak hmuh tur an awm lo.
North Vanlaiphai JAC-in an lo rel tawh angin, nimin khan North Vanlaiphaia MNF Unit panga – Bangla Veng, Rahsi Veng, venglai, Rawlkhang leh Forest Veng Unit hruaitute chuan Aizawl-a Mizo Hnam Run-ah MNF Gen Hqrs Vice President Lalthlengliana hnenah seal an theh lut a. Seal an theh luh rual hian, “North Vanlaiphaiah khawtlang phalna lo chuan MNF Unit a ding tawh lo va, a tul a nih chuan khawtlang hruaitute dawr mai turin kan hriattir a che,” tia ziakin lehkha an theh lut nghal bawk.
Thudawn danin, North Vanlaiphai atanga seal theh lut tura Aizawl-a kalte hi Thawhtanni khan MNF Vice President Lalthlengliana chuan lengah sawmin, an thil ngiat chu tun dinhmunah chawp leh chilha tihhlawhtlin mai theih a nih loh thu leh, an khuaa Primary Health Centre (PHC) chu Community Health Centre (CHC)-ah hlan kai a lo tiam chu North Vanlaiphai JAC hnenah thlenin, anni’n an duh dan a nih loh thu leh seal an theh lut lo a nih chuan khawtlang mipuiin pawndum nen an lo hmuah tur thu leh seal theh lut ngei turin an hrilh thung.
North Vanlaiphaia MNF Unit panga hruaituten nimin khan Mizo Hnam Run-ah MNF Gen. Hqrs Treasurer K Vanlalauva hnenah theh luh an tum chu a lo dawnsawnsak theih loh avangin vice president chu Hnam Run-ah koh a nih hnuah anni’n a lo dawnsak ta a ni.