Aizawl: MNF President Zoramthanga’n an khingpuite an tlakchhiat avang leh an auhlate hmantlak lohah a chhuah tawh avangin inthlanpui lo awm turah an sorkar leh ngei dawn tih chu rinhlelh rual loh a nih thu a sawi.
Thawhlehnia Diakkawn YMA Hall-a Kolasib MNF Block Conference a hmanpuinaah Zoramthang hian, “Kan khingpui ber thin, Congress chu tlachhiain an tlinna tur bial a vâng hle a. ZPM lah chuan inthlan hmasaka an vote khawn khawmna no leh thlengte kha an hmang thei ta lo va, an auhlate kha hmantlak lohah an chhuah zo tawh a. Chuvangin, inthlanpui lo awm leh turah MNF kan sorkar leh ngei dawn tih hi rinhlelh rual loh a ni,” a ti.
Chief minister hian MNF sorkar hmasaah mautam hmachhawnin harsatna an paltlang a, tun sorkarah pawh hripui lengte leh harsatna dang tam takin tlakbuak leh bawk mah se, chhungkaw thahnem tak SEDP hmanga tuamhlawm niin sem chhunzawm zel tur a nih thu a sawi a. Heng harsatna kara rorel tur hian Pathianin MNF hi a ruat thin thu a sawi.
Zoramthanga hian Lunglei Municipal Council inthlan turah pawh Pathian leh mipuite zarah sorkarna an siam ngei a rinawm tih sawiin, “Rorel lai party kan nih angin theihtawp chhuaha kan beihna azarah LMC hringtu leh dintu MNF chu sorkarna Pathian leh mipuiin min pek ngei ka beisei a ni,” a ti bawk.
Kolasib bialtu MLA, K Lalrinliana pawhin thu sawiin, sawichhiatna nasa tak karah MNF chuan diamond jubilee a thleng thei hial a, hetiang thleng thei hi party dang an awm ve lo tih a sawi a. Party thenkhat chuan kum hnih khat lekah an party hming an thlak zung zung tih sawiin, “Pathian leh kan ram tan tih thupuia neitute kan nih avangin kan danglam bik a, party mipuite pawhin hruaitute lakah rinna an nghat ngam thin a, hruaitu inthlak zeng zung kan ni ve lo a ni,” a ti bawk.
Conference hi Lalzawmmawia, Block President-in a kaihruai a. MNF president-in mi thar eng emaw zat a lawm lut bawk.