Lunglei Municipal Council (LMC) inthlanna hmasa ber chu vawiinah neih a ni dawn ta a, zing dar 7 atanga tlai dar 4 thlengin mipuiten vote an thlak ang.
LMC inthlana duty tur polling official-te chu nimin khan DC office-ah an duty-na hmun tur hrilh hriat an ni a, an duty-na hmun polling station theuh an pan nghal a ni.
Inthlana duty tur hian polling party 55 siam a ni a, polling party 44-te duty turin an chhuak tawh a, reserve polling party 11-te chu a tul anga duty tura koh reng theih turin naktuk vote thlak niah DC Office-ah an awm dawn a ni.
LMC inthlan neih tur chungchangah hian Lunglei SP Rahul Alwal chuan nimin khan thuchah tichhuakin boruak muanawm tak hnuaia inthlanna felfai leh thianghlim tak neih a nih theih nan police 158 duty tura ruat an nih thu a sawi.
Mipuite chu inthlan neih hun chhunga dan leh thupek ngai pawimawh tur leh khawtlang muanna tichhe thei leh inthlanna tibahlah thei buaina eng chi mah siam lo turin a ngen a, vote thlak theuh turin mipui a sawm bawk.
Tar lan tawh thin angin LMC inthlanna neih turah hian vote nei mi 40,548 an awm a, heng mite hian candidate 42 zing atangin an aiawha khawpui enkawltu tur an thlang dawn.
Candidate-ten nomination paper an thehluh atanga a lan danin candidate zinga naupang ber chu kum 27 mi a ni a, a upa ber chu kum 65 a ni thung a, chawhrualin kum 40 atanga 50 inkar an tam ber a ni.
LMC inthlanah hian tukin dar 7 atanga tlai dar 4 thleng vote thlak hun hawn a ni dawn a, vote tlate chu April 3, 2023-ah chhiar a ni ang.