Mizorama tlawmngai pawl lian hrang hrang intelkhawm, NGO Coordination Committee nimina Central YMA pisaa thukhawm chuan Assam Rifles luah rama dan lova LSC siamte chu a rang thei ang bera cancel turin Mizoram sorkar an ngen.
NGO Coordination Committee chuan Assam Rifles-te chu tuna an awmna hmun, Aizawl hmun laili atangin an hmun thar, Zokhawsangah insawn chhuak thuai se a duh a, an chhuahsan tur ram chu mipuite tana tangkai thei ang bera hman a nih theih nana hma la tur leh helai hmuna dik lo taka LSC siamte pawh titawp turin sorkar an ngen a. LSC neitute pawh ram leh hnam rilru pua an LSC-te surrender turin a ngen nawn leh a ni.
Tar lan tawh thin angin Assam Rifles luan chin ram chhungah hian The Mizoram (Restriction on Use of Transferred Land) Act, 2002 hmangin mi malin ram a neih a khap a, heti chung hian LSC nei hi mi thahnem tak an awm thung.
Tun hnai khan Land Revenue & Settlement Department director chuan sipai ram luah chhunga dan phal loa LSC neitute chu an ram neih chu cancel a nih lohna chhan sawi fiah turin a lo hriattir tawh a ni.
Aizawla Assam Rifles awmna hmun hrang hrangah hian mi hrang hrangin ram an nei a, Lammual ramah mi 54-in LSC an nei a, Commandant banglow ramah mi paliin, Mc Donald Hill-ah mi pathumin an nei bawk a, an zinga mi pariatin LSC hi an pe kir tawh a, sipai luah ram hmun thumah mi 53-in LSC an nei mek.
Nimina NGO Coordination Committee thutkhawm hi committee chairman, CYMA President R Lalngheta’n a kaihruai a, pawl hrang hrang – CYMA, MUP, MHIP, MZP leh MSU hruaitute an tel a ni.