Leeds United player tangkai Tyler Adams chuan tun season-ah football a khelh leh theih a beiseiawm tawh lo hle a, a malpui a tihrawl hliam a neih chu zai a ngai.
Kum 24 mi United States international Adams hi March 18 khan Wolverhampton Wanderers nen an inkhelh tumin a inhliam a. He hliam hi hun engemaw chen endik a nih hnuah a dam chianna turin zai a tha ber dawn niin an ngai.
Adams chawlh chhung tur hi sawi lan ni lo mahse zai a nih hnuah tihrawl hliam a nih avangin a hmanhmawhpui thei dawn lova, hei vang hian season zawh hma in a inkhelh leh an beisei tawh lo niin an sawi.
Manager Javi Gracia tan chanchin lawmawm lo a ni a, Premier League a inhamtan an tumna kawngah Adams hi a pawimawh.
Midfield leh defence-ah mamawh anga chhawr theih player tangkai a ni a, tun season-ah match 26 khel tawhin bul a la tan vek.