Mizoram Sub Junior Taekwondo Team chuan Thawhtanni a neih zawh ni thum awh 36th National Sub-Junior Taekwondo Championship-ah medal pathum – silver pakhat leh bronze pahnih an la.
Cuttack, Odisha a inelna hi March 25 khan neih tan a ni.
Medal lakna hi Kyorugi leh Poomsae inelnaah te niin silver medal hi MZU Taekwondo Club zirlai Laltlanmawia lak a ni a. Under 29 kg category atangin a dawng.
Poomsae inelnaah Arella Roluahpuii leh Joshua Lalthlangdika ten bronze medal pahnih an hawn ve thung.
Tlanmawia’n silver a la
Mizoram Best Fighter 2022 ni tawh MZU Campus naupang Tlanmawia hian a match hmasa ber bye-in second round atangin match bul a tan.
Puducherry aiawh tumin a kheltha nghal hle a, 13-1 a an inthlauh avangin point gap hmangin a chak nghal.
A match hnihna Quarter-final-ah Tamil Nadu aiawh tumin deciding round khelh ngaiin an inhnehtawk a. Point 13-7, 15-21-a an inhneh tawk hnuah 18-25 in a hneh hram.
Semi-Final-ah hian Chhattisgarh champion nen intumin game a tang hle. Mahse Tlanmawia hi khawng taka tang tluanin 6-4, 8-6 in round a lak ve ve avangin final a lut ta zawk a ni.
Final-ah hian Bihar champion nen insuin round an in lak chhawk a, 14-5 in Bihar-in a lak hnuah Tlanmawia’n 2-7 in a la ve leh a, deciding round-ah hian Tlanmawia chesualin a vanduai zawkah a tang a, 19-11 in Bihar lakah a chak zo ta lo a ni.
Arella a che tha
Poomsae Inelnaah Female Individual category-a khel Arella Roluahpuii, Gidae TC/Venghnuai chuan bronze medal a hlawh chhuak.
Pair inelnaah Joshua Lalthlangdika, Exodus School Taekwondo Club/Chaltlang nena tangdunin bronze medal an hlawhchhuak bawk.
Inkhel dangah Under 41kg-a khel Zaihruaimawii, Mission Vengthlang/GidaeTC chuan Manipur aiawh hneh lovin Quarter-final ah a tawp a, Lalhruaitluanga Under 27 kg (MZU TC) pawh a tumpui Odhisa aiawh paltlang zo lovin a zin kawng a ti tawp bawk.
Mizoram Team hi Vanlalmawipuian a hruai a, Mizoram team-te hian Thawhlehni khan Cuttack an chhuahsan leh nghal.
Vawiin atanga Zirtawpni chhunga MATA Halla buatsaih tur 17th Mizoram Open Taekwondo Championship khel leh hmanin an rawn thleng ang.