Ni 10 zet a tlanchhiat tawh hnuah pawh Indian thuhriltua inchhal chu a awmna chin hriat loh la ni zelin a awmna chin sawi a inang lo zung.
Thubuai tam tak, mi thah tumna thlenga thubuai nei, Amritpal Singh-a hi man tumin ram pumah zawn mek zel a ni.
Sawi dan thenkhatah chuan Punjab atanga March 18-a a tlan bo hnuah Singh-a hi Indian khawpui paliah hmuh a ni a, heng zingah hian khawpui ber, Delhi pawh a tel.
Nepal hnenah pawh India-in ngaihven tura a ngen avangin thlithlai mek a ni bawk.
Thawhlehni zan khan Punjab police chuan chanchinbu thenkhata an state la chhuahsan lo anga tar lan a awm avangin Hoshiarpur district-a khaw pakhata inte chu an dap vak.
Hemi ni vek hian state sorkar chuan Punjab & Haryana High Court-ah police-in Singh-a chu ‘an man tep tawh’ tiin a hrilh.
A binga thil thlir thin nia puh, Singh-a hi Punjab-a tharum thawhna tithleng thar leh theitu tura ngaiin man tum a ni a, man tuma beihna hian chawlhkar hnih dawn chhung chu India-a chanchin thar luahtu lian ber niin police officer-ten state ramri an endik uluk a, khawlai leh kawtthler an suartluan bakah surveillance footage hrang hrang an en kual bawk.
February thlaa a hoten police station an luhchilh atanga ram puma hriat hlawh ta, Singh-a hi Khalistan (Sikh state hran ngaittu) thlawptu a ni a. A lar thar thutna hian kum 1980 chhova Punjab-a helna chhuaka mi sang chuang an thihna kha a thlen leh hlauhna a awm a ni.
Man tuma zawnna hi state pali leh thenawm, Nepal ramah kalpui mek a ni a, thu lengvel pawh a tamin mak taka put ru thei zel anga sawi pawh a awm bawk.
A awmna chin hi tumahin an hre rih lo va, police erawh chuan ni 10 an zawn tawh chhungin hnuhma an hmu zel tih sawiin chungte chu an bawhzui nghal zel tih an sawi bawk.
Hetih lai hian tual chhung chanchinbute chuan khawpui hrang hranga surveillance footage-ah Singh-a a lang nia sawiin an thehdarh nasa hle bawk.
Heng clip zingah hian Punjab khawi emaw laia tawlailir siamchawp tak, motorcycle nena inhnuka a chuang lai nia sawi te; Singh-a’n a thawhpuite nena bura thil a in lai a thla a inlak lai te; Delhi-a hmai tuama khawlaia a kal lai te pawh a awm a; mahse, hengho hi police-in amah a ni ngei tih an la finfiah thei hlawm lo vek.
Sikh hruaitu lawk tak takte chuan engati nge tun thlenga police-in Singh-a an la man theih loh chhan an zawt ve mek.
Tunah hian a zawn hna hi Punjab huam chhungah kalpui thar leh mek a ni.