Punjab police-in Singh-a man an tum tanna hi March 17 kha a ni a, a hma lawkin a lamtangten an pawla mi pakhat chhuah phutin police station an luhchilh hnu a ni.
Police thahnem tak inrintir an ni a, Singh-a chu car-a chak taka a tlan an umzui a, hei hi a miten live-in an tichhuak nghe nghe.
Police chuan Singh-a hi Mercedes SUV-ah a chuang niin an sawi a; mahse, a hnuah car tê zawkah insawnin a hnuah bike-a phurh leh niin an sawi.
Singh-a a tlan bo hnuah hian thuneitute chuan mi maktaduai 27 vel chenna, Punjab-ah internet service an titawp zui a, hei hi mi dang leh Singh-a thlawptute an inbiakpawh theih loh nana an ti a ni.
March 21 khan Punjab police chuan CCTV footage tichhuakin hetah hian Singh-a chu mi dang anga incheia motorcycle-a a chuang lai a lang.
Hemi ni vek hian police chuan thawmhnaw hrang hrang a hakna thlalak pasarih an tichhuak zui a, pakhatah phei chu AI-generated version niin a khabe hmul awm lovin a ni.
March 24 khan chanchinbu eng emaw zatin Singh-a hi Delhi-a hmuh angin an sawi.
News agency ANI chuan police pakhat hnen atangin Singh-a hi a thuihhruai nen bus terminal-ah hmuh niin sadhu (Hindu thuhriltu) angin a inchei niin a sawi tih a tar lang.
Delhi leh Punjab police team chuan khawpui chhung dapin ramri pawh an en uluk a, Singh-a lamtang tam tak an man bawk.
Punjab Inspector General of Police Sukhchain Singh Gill chuan a puh ruk hnuah Singh-a hi an thenawm, Haryana-a hmeichhe pakhat inah a tawm niin a sawi a. Lawnglenga lui kâna Haryana luh a tum phawt a; mahse, kea thui tak kalin a kai ta zawk niin thuthar lakhawmtute a hrilh.
Gill-a chuan hmeichhia hi March 26-ah manin a inpuannaah kum hnih leh a chanve liam tawh atangin Singh-a nen hian inkawmin tun hma pawhin Kurukshetra district-a a inah vawi tam a thleng tawh niin a sawi.
Police-in Haryana-a a awm lai nia an sawi surveillance footage an tichhuak zui a. Clip-ah hian kawr var leh jeans dumpawl a ha a, a hmai chu nihliapin a hliah a, hei hi hmeichhe in atanga chhuah ruk a tumna niin an sawi.
Hetih lai hian Uttarakhand a pan nia sawi a awm a; mahse, Punjab police chuan a nih thu an sawi ve lo.
Thawhtanni khan Nepal chuan Indian embassy-in an ram a luh theih thu an hrilh avangin Singh-a chu an thlithlai thu an sawi.