Manipur khawpui, Imphal-ah Thawhlehni khan mi sang tam tak, National Register of Citizens (NRC) kalpui phut leh Manipur State Population Commission din duhtu pungkhawm leh police an innawr nasa hle.
Mipuite hian state sorkar chu NCR leh MSPC din tur hian ‘tihkhawtlai dan hrang hrang hrang an dap’ niin an puh.
Zirlai pawl lian tak takin thil phut leh lungawi lohna an lantir hi ‘Ima Market’ (Mothers’ Market)-a inpho nuho leh Coordinating Committee on Manipur Integrity (COCOMI) member-ten an thlawp a. Chief Minister Biren Singh-a chenna in lam panin kawng an zawh a ni.
Police thahnem takin chief minister chenna an pan tur hi lo dangin an innawr phah a, lehlam lehlamah hliam tuar pawh an awm ve ve.
Darkar khat chuang innawr, inhnial leh an inau hnuah Manipur Police chuan an thunun thei tih an sawi.
Manipur Students’ Federation kaihhruai zirlai awl parukte hi Imphal lailia Ima Market tualah an pung khawm hmasa a, sumdawng nuten tawiawmin kawng an zawh zui ta a ni.
Placard an kenah chuan ‘ram leilung fate dikna chanvo leh an hma hun humhim’ te, ‘ramngaw leh khuarel humhalh’ an duh thute an ziak lang hlawm.
Zirlai pawl, COCOMI leh nute hian Manipur sorkarin an thil phut – dan lova pem lut thin dang tura beihna te, NRC kalpui tur leh population commission an din hma loh chuan an kal zel dawn tih an sawi.
Zirlai pawl parukte thupuangtu, Salam Upen chuan ram leilung fate humhalh leh venhimg tura sorkar an phutna a hlawhtlin hma loh chuan an nawr zel dawn tih a sawi.
Mipuite hian an state-ah chuan India ram leh ram dang atangin mi an lut nasa hle niin an sawi a. Myanmar, Nepal leh Bangladesh atangin an lut nasa a, hei hian an nihna, an khawsak phung, an eibar dinhmun, an inawpna leh Manipur-a khuarelin a tuar nasa hle niin an sawi.
Zirlaite hian dan lova an state-a lutte chu man chhuaka thawn chhuak leh turin sorkar chu an phut a ni.
Nikuma Manipur assembly thutkhawmah private member resolution luta population commission din rawtna chu pawm a ni a, state cabinet pawhin Manipur State Population Commission din turin thu a lo titlu zui tawh bawk.
Hetih lai hian a taka kalpui tur erawh chuan hmalakna a la awm lo va, engtik atangin nge a nih dan tur anga a kal dawn pawh hriat a la ni lo.
December, 2019 khan sorkar laipui chuan Inner Line Permit system khauh zawk duangin pawn lam atanga lutte dan tumna atana a ruahman a nih piah lamah ram leilung fate himna atana a tih a ni.