Aizawl : MZP-in kum 2018-a Reiek-a Zo hnam inkhawmpui lian Zofest a buatsaih hriatrengna lungphun a buatsaih chu tunkar Thawhlehni khan MZP President hlui C. Lalrokhuma’n a hawng.
Kum 2002 atang khan MZP-in Zofate insuihkhawm theih nan leh khawvel hmun hrang hranga Zofate inpawh leh zual theih nan Zo hnam inkawmpui lian Zofest hi an buatsaih tan a. Zofest hmasaber chu Churachanpur, Manipur-ah buatsaihin, Aizawl; Darchawi, Tripura; Haflong, Assam; Zokhawthar, Reiek leh Sialsuk-ah te an buatsaih tawh a. Zofest an buatsaih tawhnaah te Zofest hriatrengna lung phun vek tumin, Reiek bakah hian Sialsuk-ah an phun tawh a, hmun dangah pawh phun zel turin hma an la mek niin an sawi.
Reieka Zofest 2018 hriatrengna lungphun hawngtu MZP President hlui C. Lalrokhuma chuan MZP-in Zofate mamawhna zawn zelah hma a la thin nia sawiin, hun hmasa lamah zirna leh thu leh hla tihhmasawn a nih theih nan ke a lo pen tawh thu a sawi a. “Remna leh muanna a awm theihna tur pawhin MZP-in a thawhhlawk hle” a ti.
MZP President hlui chuan Zofate insuihkhawm theihna tura MZP hmalakna pawhin rah duhawm tak a chhuah mek zel niin a sawi a. “MZP chu kan unaute tan a ding tlat thin a, harsatna leh manganna an tawhin an tan kan awm thin, tunah pawh hian kan unaute tan kan ding tlat tur a ni” tiin, “Ram hmasawnna (development) aia kan ram leh hnam himna kan ngaihpawimawh hmasak fo loh chuan kan ram hi a ngaihtuahawm hle ang, chu chu khawvel hnam dangte ralna bul a ni” a ti bawk.