Aizawl: A bial, South Tuipui tlawha zin mek, Health Minister Dr R Lalthangliana chuan Covid-19 leng leh harsatna tam tak karah MNF sorkarin thil tam tak an thawk a, theihtawp chhuah chhunzawm zel an tum thu a sawi.
Health minister hian Covid-19 vanga harsatna karah sub-centre 374 chu health & wellness-ah hlan kai zawh mek a nih thu te, PHC 61 an tihchangtlun tawh te, CHC-te nen a vaiin tun sorkarah damdawi in 400 chuang an tihchangtlun tawh thu te, Saisih atanga Myanmar border trade inkalpawhna tur kawng hma lak mek thu te a sawi.
Sawi chhunzawmin Dr R Lalthangliana hian MNF sorkar hmaa lirthei kal theih lohna, South Lungleng kawng JCB-a a nawr chhuahtir leh a siam thatna tur project kalpui mek dan te, Muallianpui Sub-Centre chu health & wellness-ah hlangkai tawhin, Thingsai to Bualpui ‘H’ pavement an siam zawh tawh dante leh Aithur kawng siam thatna turin kumin thalah Rs. nuai 100 hmanga hmalak mek thute a sawi a. Thingsai kai border trade atana hma lak mekna pawh India sorkarin Myanmar sorkar dawr a remti rih lo va, boruak ziaawm velah hmalakna chhunzawm leh an tum thu a sawi bawk.
Dr R Lalthangliana hian, “Covid leh harsatna tam tak karah thil tam tak kan thawk a, theihtawp kan chhuah chhunzawm zel ang. SEDP pawh hripui vanga tum anga kalpui theih lohnaah pawi kan ti a. Financial year thar kan lut dawn a, SEDP pawh a rang chiin thahnem tak inpek chur chur kan tum a ni,” a ti.
Commerce & industry minister hian Covid-19 khan tun thlengin India ram state zawng zawng sum leh paiah a la nghawng zel a, Orrisa state chiah a nghawng ve lo a, anni chuan kum tin mining atangin cheng vaibelchhe singnga an lak vang a nih thu sawiin, “Keini pawhin mining lam hi sum hnar tha a ni tih hriain theihtawpin hma kan la mek zel,” a ti bawk.