Russia rama hmeichhe hlang awmna punk band lar Pussy Riot-a an khainu Nadya Tolokonnikova chu ramchhunga ‘Most Wanted List’ ah dah a ni.
Mihring dikna leh chanvo nasa tak palzutna leh press zalenna awm map tawh lova ngaih Russia-ah hian zalen taka ngaihdan huai taka sawi ngam a ni meuh tawh lova, a bik takin Ukraine nena indona an kalpui mek lai hian hruaitute sawisel chu ram phatsantu ah ngaih niin, jail tan leh na taka hrem theih an ni.
Russian Interiro Ministry database-a a lan danin, sorkar nasa taka sawisel thin Pussy Riot member Nadya hi ‘Most Wanted List’ ah a langsar viau mai a ni awm e.
Amah hi tunhma atang tawha Vladimir Putin na taka sawisel thin leh hun rei tak chhung activist hriathlawh tak a lo ni tawh a, sorkar tan paw’n Pussy Riots hi an hnawksak hman hle a ni.