Brazil president hlui, Jair Bolsonaro chu United States-a hun eng emaw chen a tlanchhiat hnuah an ramah a haw leh ta.
Far-right hruaitu hlui hi thla thum liam ta zawng a awmna, Florida atangin sumdawng thlawhna hmangin an khawpui, Brasilia-ah a haw a ni.
Tun hi January 8-a amah thlawptuten Brasilia-a sorkar hmun pawimawhte an luhchilh hnuah a haw leh hmasak berna a ni.
He thil thlengah hian a inrawlh em tih chhui lai mek a ni nghe nghe.
Ni 89 lai a awm loh hnua a lo let leh hian hruaitu hlui hi tuten nge lo hmuaka chibai lo buk tih hriat a ni lo.
January 8-a thil thleng avang hian police pawh fimkhurin an khawpuia hmun lun lai an vil uluk hle a. Thlawhna tumhmunah pawh arrivals hall-ah pungkhawm an tam hlauvin a hnung lam atanga chhuahtir a ni.
Hetih lai hian Brazilian news site O Globo chuan Ningani zing dar 6:37 (India-a tlai dar 3:07)-a thlawhna a tum atangin amah thlawptute aiin police officer an tam zawk niin a tar lang.
Thlawhna tumhmun atang hian a kaihhruai, Liberal Party hmunpui panin a nupui, Michelle leh an party hruaitute a hmu zui.
Liberal Party hruaitu pakhat chuan kum thara tual chhung inthlan lo awm turah Bolsonaro hi an party tan campaign turin a inbuatsaih niin a sawi a. Hetih lai hian Florida a chhuahsan hmaa CNN-in an kawmnaah chuan president tanglai, Luiz Inácio Lula da Silva eptu berah a tang dawn lo tih a sawi thung.
Mi thiamte chuan thla thum a biruk chhung khan Brazilian politics-ah conservative politician langsar leh insawhnghet an lo awm hman niin an sawi.
Bolsonaro hian sipai thlawhna hmangin December 30 khan an ram a chhuahsan a, hei hi president thar tur, left-winger Lula hnena nihna a hlan chhawn hma ni hnih a ni.
Lula hian Bolsonaro hi October 30-a president thlanah a hneh hram a, far-right hruaitu hian a chak loh tih hi a pawm tih a la sawi lo.
Amah thlawptu tam tak pawhin Lula hnehna chan chu pawm lovin sipaiten president thlan thar chu an paih thlak mai beiseiin an barrack kiangah rei tak an inkulh.