India chuan kum 70 chuang zet hnuah cheetah no hmel a hmu leh ta a, a rama a mang atanga awm ngai tawh lo ramsa hian no a nei thar a ni.
Union environment minister chuan ‘chanchin lawmawm tak’ tia sawiin thuthar hi Twitter-aha tar lang a, ‘hun chhinchhiahtlak’ a ti.
India hian zawhte lian chi kum tam tak chhung a rama awmtir leh tumin hma a la a, a hmalakna peng pakhatah nikum khan Namibia atangin pariat a la lut.
Thla hmasa khan South Africa atangin 12 a la lut leh tawh bawk.
Note thar pali hi September thlaa Namibia atanga an lak luh zinga a nu pakhatin Kuno National Park wildlife-a a hrin a ni.
Environment Minister Bhupender Yadav chuan Twitter-ah thuthar hi puangin, ‘a phurawm tak zet’ tih a sawi.
“Project Cheetah team-a thawktu zawng zawng, India-a a awm leh theih nana chhum lo chat lova beitute ka lawmpui a, tun hmaa an awmphung dik lo taka siam thinte chu an siam tha vek a ni,” a ti.
Prime Minister Narendra Modi pawhin ‘chanchin duhawm tak’ tiin a sawi bawk.
Cheetah note hi ni nga vel kal taa piang kha an ni a; mahse, Nilaini khan thuneituten an hmu chauh niin Press Trust of India chuan a tar lang.
Park thuneitu pakhat chuan a pui, Siyaya leh a note hi an him a, an hrisel tha niin news agency a hrilh bawk.
Namibia atanga cheetah lak luhten thuthar lawmawm tak an neih hma lawk, ni hnih liam taah khan lak luh pariat zinga pakhat chu Kuno National Park-ah hian a kal tha lo vangin a thi tih puan a lo ni tawh thung.
Nikuma India-a phurh luh an nih khan sa ei chi ramsa lian khawmualpui danga sawn hmasak ber an ni a, ram hnuaiah chhuah zui an ni.
Khawmuala cheng zinga tlan chak ber, cheetah hi India-ah hian kum 1952 khan an mang tih puan a ni a. An pel nasa a, an chenna thin hmunte tihchhiatsak an ni nasa a, sa pelh tur an neih mumal tawh loh bawk avanga mang nia ngaih a ni.
Khawvel puma cheetah 7,000 vel awm zinga a tam ber hi Africa-a South Africa, Namibia leh Botswana-a awm an ni.
Asiatic cheetah an tih pawh mang mai hlauhawm ni mek tawhin Iran-ah chauh an awm tawh a, 50 chuang awrh chauh dam tawha ngaih an ni.
Cheetah hi khawvel pumah ‘mang hlauhawm’ tiin International Union for the Conservation of Nature Red List of Threatened Species-ah tar lan a ni.
Hnim hring hmun hmunah sa ei tur umin darkar khatah km 112 zeta chakin an tlan thei.