Aizawl: Ni hnih awh tur, Vantawng Group YMA Inkhawmpui Vawi 25-na chu nimin khan Police Training School Branch, Thenzawlah neih a ni a. Thenzawl district a pian theih nan hmalak an rel.
Vantawng Group YMA President Chawngsangliana kaihhruaiin nimin chawhma khan Vantawng Group YMA Inkhawmpui rorel inkhawm neih a ni a. Sorkar khawih thupui rel tur lut hrang hrang zingah Thenzawl district a pian theih nan chak taka hmalak nise tih te, Thenzawlah RD Block a awm theih nana hmalak nise tih te, Vantawng Group YMA hnuaia zirtirtu mahni post ni loa thawkte mahni post ngeia thawk tura hmalak ni se tih leh Thenzawlah sub-treasury office a awm theih nan hmalak ni se tih te an rel.
YMA khawih agenda-ah hian Vantawng Group YMA buatsaihin Chapchar Kût hman ni rawh se tih te, Vanva lui dunga lo thianghlim nan nana hmalak te, branch hrang hrang fai inelna neih te, ruihhlo do kawnga chak zawka hmalak te leh environment humhalh kawnga hmalak ni se tih te a tel.
Chawhnu lamah Sub-Headquarters YMA, Serchhip hruaitute kaihhruainain Vantawng Group YMA hruaitu thar thlan a ni bawk.
Nizan khan vantlang inkhawm neih niin, Vantawng Group YMA Inkhawmpui kum 25-na, Silver Jubilee mei det a ni a. Vawiin hian inkhawmpui hi chhunzawm a ni ang a, zanah a tiak ang.
Vantawng Group YMA-ah Thenzawl khawchhung YMA branch pakua leh Neihloh, Buangpui, Kanghmun South leh Zote South Branch YMA-te awmin member mipa 3,674 leh hmeichhia 3,081, an vaiin 6,755 an awm mek a ni.