Manchester United chuan tun season zawh hma ngeiin Marcus Rashford-a contract thar tura inbiakna chu tihfel theih an tum.
United hian December thla khan Rashford a contract neihlai a kum khat ziah belh theihna chu an hmang a. Tun dinhmunah kum 2024 thleng club-ah hian a cham dawn. United hian hemi hnu thleng daih tur contract lian zawk pek an duh.
Rashford-a lam atangin player hian a contract chungchang hi a ngaihsak rih lova, club leh mimal a season hlawhtling tak an hman theihna turin a insawrbing rih tih sawi mahse a aiawhte lamin contract chungchang erawh club nen inbiakna an nei dawn niin an sawi.
United hian tun nipuiah contract hi tihfel theih an inbeisei a, kum 25 mi hian United a a season tha ber tia chhal ngam a hmang mek a, nikum lam khan French champion Paris Saint-Germain chuan an lo ngaihven tawh.
Nimahsela amah Rashford hian a seilenna United a cham zel hi a duh nia ngaihna a lian a, coach Erik ten Hag hnuaia khelh chhunzawm zel a duh.
United hian nipuiah Rashford-a khelhpui tur striker lakluh ngei an tum dawn nia sawi a ni bawk a. Hei bakah hian first team player engemaw zat chu chhuahtir an huam a, nipui a sum hman tur an neih belh theihna tura inpaihthawl an duh a. UEFA hnuaia Financial fair play dan an bawhpelh lohna turin sum siam tel an mamawh dawn avangin an fimkhur.
Club neitu thar nei neiin sum tam tak seng pawh nise FFP dan an bawhchhiat theih tho dawn avangin tawngpawng sum hman an tan a rem lo.