Barcelona defender Andreas Christensen chuan Premier League club-te atangin ngaihven a hlawh viau a. Tun nipuiah sum tam tham tak senga lakluh tum an awm dawn niin thu a thang.
Kum 26 mi hian nikum nipui khan Chelsea chhuahsanin free transfer in Barcelona hi a zawm a, a season hmasa berah che tha nghalin team a player pawimawh zing ami a ni nghal.
Player lam hian club chhuahsan tumna a nei lova, tin a club pawhin Denmark international hi chhuahtir duh lo mahse hmun thenkhatah an club sum dinhmun in a zir loh avangin sum tam tham taka dawrna an dawn chuan an tan hnar a harsa dawn niin an ngai.
Barcelona hian tun dinhmunah La Liga hnuaia financial fair play dan an zawmna turin Euro maktaduai 150 vel an hmuh let a ngai dawn a. Hei hi an tlin a nih loh chuan Gavi, Ronald Araujo leh Marcos Alonso te contract thar ziah tawh chu an ziak lut thei dawn lo.
Barcelona tana sum hmuh theihna awlsam ber chu player hralh a ni a, mahse manager Xavi Hernandez chuan a player tha te hi chelh hram a duh.
Hei hi club dangten remchangah lak an tum dawn niin an sawi a, free transfer a lakluh a nih avangin Christensen an hralhna hi Barca tan hlep a ni nghal dawn a. Hetiang bawk hian Ivorian midfielder Franck Kessie dinhmun pawh a chiang lo mek.
Barca hian nipuiah player thar lakluh an tum tho avangin an insiksawi viau a ngai dawn niin an sawi tel.