Barcelona beiseina, Spanish rawlthar Gavi chu first team squad-ah telh a ni tawh rih lova. A contract chungchang avangin ziah luh theih ni rih lovin kawr no. 6 a hak thin pawh hlihsak a ni rih.
Kum 18 mi hian September thla khan contract thar, lian zawk ziakin first team player anga ziah luh a ni a. Tuna a coach ni lai Xavi Hernandez hak thin no. 6 chu haktir a ni.
Nimahsela hi an sum dinhmun avanga an buaina kal zelah Gavi contract thar hi La Liga hnuaia ziah luh theih a ni lova. Court thupek angin Barca reserve team lamah ziahluh a nih tawhna chu rin a ni dawn.
La Masia chhuak Gavi hi Juvenil A player anga ziahluh a la ni rih dawn.
Gavi hi first team tan la inkhel thei dawn tho mahse Barcelona tan a contract thar ziah luh theih loh hi a pawina a awm a. Tun nipui thleng daih a nih dawn avangin club dangten man lovin sum tam zawk hlawh turin an thlem chhuak thei dawn tihna a ni.
Barcelona hian Gavi ziahluh theihna tur hian an senso lamah insiamrem theih ngei an inbeisei a, nimahsela hetihlai hian German club Bayern Munich te pawhin an rawn ngaihven tan niin an sawi mek.