Colombia chuan drug lord Pablo Escobar-a tuivawk zinga 70 chu ram dangah a dah dawn a, hemi atan hian $ maktaduai 3.5 zet a seng dawn.
Cocaine baron hian kum 1980 tawp lamah khan African ramsa kawlh hi tlem azawng Colombia-ah a la lut a; mahse, kum 1993-a a thih hnuah khan Antioquia region-a a khawina hmunah anmahni tlat tlatin an tla a, tunah phei chuan 150 zet an tling tawh.
Escobar-a ranch, Hacienda Napoles leh tuivawkte hi Colombian police-in drug kingpin an thah hnuah khualzin hiptu tha tak a ni a. A ranch hi hluihlawn a nih hnuah tuivawkte hi luidungah tlain an inthlahpung zel a, tonne thum zeta ritte pawh an awm.
Scientist-te chuan heng ramsate hian Colombia-ah anmahni tihlumtu tur ramsa dang an awm lo va, pun zel mai loh chu hmabak an nei lo niin an sawi.
Nikum khan Colombia sorkar chuan tuivawkte hi a hnawk chang a awm niin an sawi a. Thuneituten tihchin an tum ngial a, an hlawhchham thung.
Ruahman dan chuan an zinga 60 chu, Greens Zoological Rescue & Rehabilitation Kingdom, Gujarat, India-ah thawn an ni ang a, a dang 10 chu Mexico-a sahuan leh sanctuary-ah an dah dawn a, heng zingah hian Sinaloa-a Ostok pawh a tel.
“Sawnna tur hi $ maktaduai 3.5 vel zet tur a ni,” tiin Ostok Sanctuary neitu, Ernesto Zazueta chuan thuthar lakhawmtute hnenah a sawi.
Escobar-a tuivawkte hi suat mai pawh sawi rik a awm tawh thin a. Tunah hian Ecuador, Philippines leh Botswana ramte pawhin lak luh an duh nia sawi a awm mek bawk.
Escobar-a hi a hun laia khawvela outlaw tawrawt ber pawl a ni a, Colombia-a ruihhlo kaihhnawiha thihna leh bomb tihpuahah a inhnamhnawih nasa hle.
Escobar-a hi December 2, 1993 khan Medellin-ah police leh sipaiten in chungah an kap hlum a, a kum 44 tlin tuk chiahah a ni a. A hma thla nga lekah Forbes chanchinbu chuan khawvel mi hausa pasarihna hauhtu angin a chhuah a ni.