India ram lailia temple hnuaia tuichhunchhuah siam chu a chung chhuat a chim avangin a chhungah mi an tla lut a, mi 35 vel an thi tih tual chhung thuneituten an sawi.
He chhiatna hi Madhya Pradesh-a Indore khawpuia temple pakhatah Hindu sakhaw kût pakhat, Ram Navami lawma Ningania mi an punkhawm laia thleng a ni tih an sawi bawk.
“Mi 18 kan chhanchhuak a, mi 35 erawh thiin kan hmu a, mi dang 16-in hliam an tuar bawk,” tiin Indore-a District Magistrate Ilayaraja T chuan Zirtawpni khan Reuters news agency a hrilh.
Times of India chanchinbu chuan Ningani zanah pawh khan chawl chuang lovin chhanchhuah hna thawktute an che a, tui chhunga hman chi thlalakna hmangin tuichhunchhuah mawnga chirh karah mi ruang an hmuh chu lak chhuah tumin an bei niin a tar lang.
Chhanchhuah hna thawktu mi 140-in tui an lak (pump) chhuah hnuah hrui leh leilawn hmangin ruangte chu an la chhuak a. A zim avang leh a chim hnawk tla lut a tam bawk si avangin a hautak hle.
Police Commissioner Makrand Deoskar-a chuan temple chhuat, tuichhunchhuah chung a chim hian a mi thahnem tak tla lutte chu a chim hnawk tlain a delh zui nasa niin a sawi.
Temple thuneitute hian he tuichhunchhuah hi kum khat liam ta vel atangin an hmang tawh lo va, a chung chu thir leh tile hmangin an tiphui niin thuneituten an sawi.
Chief Minister Shivraj Singh Chauhan chuan a chunga mi thahnem tak an punkhawm takah khan a dawl ta lo chu a chim ta niin a sawi.
Chouhan chuan mi 18 chhanchhuah an nih thu leh hliam an neih nual avangin damdawi ina an dah thu a sawi a. Chhiatna thleng chu chhui turin thu a pe nghal bawk.
January khan khawpui roreltute chuan temple neitute hnenah hian tuichhunchhuah an khuh chu a him loh avangin thuneitute enpui lohva siam a nih avangin thiat turin an lo ti twh a; mahse, temple thuneitute hian an ngai pawimawh lem lo niin Times of India chuan a tar lang.
Thil thleng hmutute chuan chhiatna a thlen lai hian temple-ah hian kût lawmin mi an tamin an phusa nasa a, mei an kal hual niin an sawi.
India-ah hian in leh thil sak dang chim hi a tam hle a, hei hi a sak dan that tawk loh vang a nih bakah enpuitu turte pawhin an enpui that loh vang a ni fo.
October thla khan khawthlang lam, Gujarat-ah cable suspension bridge chu a chim tawh a, a hnuai luiah mi tam tak an tla a, mi 132 zet thiin he chhiatna hi kum 10 chhung vela India-a chhiatna thleng lian ber a tling.