Mizoram Pradesh Congress Committee (MPCC) President Lalsawta chuan tun hnaia Gujarat court-in All India Congress Committee (AICC) president hlui, Rahul Gandhi chu thiam loh a chantir chungchangah BJP chu anmahni sawiseltute khap tumah a puhin, “India ram chu dinhmun hlauhawm takah a ding mek,” a ti.
Nimin khan India ram state hrang hrangah Congress party chuan Gandhi thlavang hauhna hun an hmang a. Mizoramah pawh MPCC chuan Aizawl Press Club-ah thu thar thehdarhtute an kawm a. An party president, Lalsawta chuan inpuh hmingchhiat avanga court-in thiam loh a chantir leh MP a nihna atanga chawlhtir a nih chhante sawi fiah.
Lalsawta chuan kum 2019-a Lok Sabha inthlanpui neih dawna a thusawi chu inpuh hmingchhiatnaah an ngaih avang leh hnawk an tih avangin BJP sorkar chuan court-a thiam loh chantira jail-a kum hnih chhung tantir tura hma an lak bakah Lok Sabha MP a nihna atanga chawlhtir tura hma lain a chenna bangla chhuahsan tura tih a nih thu a sawi.
MPCC president chuan Gandhi-a chunga BJP chet dan chu mipui zalenna leh democracy palzutnaah puhin, “Hei hi mi mal inbeihna a ni lo a, Gandhi thubuai ni loin, India ram mipui zalenna thubuai a ni. Ram tana tha zawk duhna avanga thil dik lote sawisel ngam lo tura tih thaihin kan awm mek a ni,” a ti.
Gandhi-a’n thil dik lo a auchhuahpui ngam vangin BJP sorkarin hnawk an tih thu sawiin, “BJP chu anmahni sawiseltute khap beh tumin hma an la mek tih a chiang a. India ram chu dinhmun hlauhawm takah a ding mek a. Mipui rorelna an tiderthawng tan a ni,” tiin, BJP-in India ram an pawngsual dan hi mipui hriattira inzirtir zel a ngai niin a sawi.
Lalsawta chuan, “Thu dik leh mahni ngaihdan pawh sawi ngam lohna turin hma an la mek a. Sakhaw zalenna pawh UCC atangin hma an la chho mek zel a. Mipuite hian zalenna kan nei lo tial tial a. Ram hmasawnna tura sorkar dik lohna sawi ngam kan mamawh a ni,” tiin, BJP sorkar chu Italy rama Benito Mussolini leh Hitler ten dictatorship an kalpui angin India ram hi an kalpui mek angah a tehkhin a ni.
Union Home Minister Amit Shah leh Supreme Court Justice KM Joseph ten Gandhi chu thiam loh an chantir chungchangah court-a a appeal mai loh chhan zawhna chhangin Lalsawta chuan, “A appeal duh lo a ni mai,” a ti.