Aizawl : Tourism Minister Robert Romawia Royte hovin Sakawrhmuituai tlang leh a chhehvel tlawhtute leh khualzinte inhnangfakna tur Tourist Cafeteria sakna hmun tur chu Sihphir VC leh Lungdai VC ten Inrinni khan an en ho.
Tourist Cafeteria hi Sihphir leh Lungdai inrina bul, kawngpui hrulah sak ni se, an ti a. Lungdai VC ten lehkha ziahfel ngai te pawh reiloteah tihfel an tum thu an sawi.
Tourism Minister chuan Sakawrhmuituai tlang leh a chhehvel chu mipuiin an tlawh nasa hle nia sawiin, mumal zawka enkawl zel tul a tih thu a sawi a. Cafeteria sak hna pawh rang taka tan ni se a duh thu a sawi.
Hemi ni vek hian Tourism Minister chuan a bial Aizawl East-II a Bethany road, Chhinga Veng hmun hniha lei dawh mek te tlawhin a enfiah a. Chhinga Veng chhunga Bethany area chu kawngpuiin a pawh ve theihna tura theihtawpa tan a lak thu a sawi bawk.
Sorkar thuchhuahin a tarlan danin, he hna thawh nan hian Ministry of Tribal Affairs sum Rs. nuai 140 leh Finance Ministry sum Rs. nuai 50 sanction tawh a ni a, Mizoram PWD-in an thawk mek a ni.