Aizawl Traffic Police-in Bureau of Indian Standard (BIS)-in a pawm chin leh a tlukpui helmet khum lo mi 700 vel an man tawh a, tun hnaiah dan bawhchhia man tur an awm tawh lo.
BIS phut ang ni lo, lirthei ke hnih khalhtute himna atana tlak loh nia ngaih, helmet him lo khumte chu March 1 atang khan Aizawl-ah Traffic Police-ten an endik tan a, a him lo khumte chu an man thin.
Hemi chungchanga The Zozam Times zawhna chhangin Traffic SP Rodingliana Chawngthu chuan helmet him lo khum an endik tan tirhah man tur an thahnem hle a, helmet zawrhna dawrte pawh a lun phah hle tih a sawi a. Chutihrual chuan dan an kenkawh atanga kar khat hnu atangin man tur an tlem tan niin a sawi.
Traffic SP chuan mipuiten dan an zawm tha chho hle nia sawiin, tunah phei chuan he dan bawhchhia man tur an awm tawh lo niin a sawi a. March thla chhunga helmet him lo khum an man chu mi 700 vel an nih thu a sawi.
Helmet him lo khum zingah nunna chân an lo awm tawh thin thu Traffic SP chuan sawiin, “Ka hriat chinah Aizawl chhunga lirthei ke hnih nei accident avanga boral mi pali vel chu helmet him lo khum an ni,” a ti a. Hengte avang hian lirthei khalhtute himna atan he thil hi kalpui a nih thu a sawi.
Thudawn danin helmet him lo khumte endik tan a nih lai khan Supreme Court order leh MV Act dana ‘two wheeler hnunga chuangten helmet an khum ngei tura tih’ tih chu kengkawh turin police hotute hnenah rawtna a awm a, hetihlai hian dan chu mipui tana phurrit a awm theih avangin hmalak a ni ta lo a ni.
Two wheeler hnunga chuangten helmet an khum tur tih thupek chu kalpui turin January 12, 2017 khan Mizoram sorkara transport department secretary-in hriattirna a lo tichhuak tawh a, sawiselna a nasat avangin a taka kenkawh a ni lo a ni.