Aizawl: Inrinni khan I&PR Minister Lalruatkima’n Aizawl West Joint YMA Sport kharna inkhawm, Joint YMA Multipurpose Hall-a neih chu khuallian niin a hmanpui a, YMA chu Mizo hnam venghimtu a nih thu a sawi.
Lalruatkima hian zawlbuk hun a liam a, YMA chu zawlbuk a lo ni ta tih sawiin, “YMA hi Mizo hnam venghimtu a ni a, kawng hrang hranga Mizo hnamin beih a tawh chuan YMA hi a lo pen chhuak thin a. Kan ram leh hnam rohlu, YMA a vul zel nan mi zawng zawngin ke kan pen a ngai a ni,” a ti.
Jt YMA adviser ni bawk, Lalruatkima chuan dikna, rinawmna leh taimakna chhawm nun zel a ngai tih sawiin, Mizoram hi ram chhe ta vek anga sawi fo thin chu a dik lo tiin, mi tha leh rinawm tak tak thahnem tak an la awm reng a ni hriat a tul thu a sawi bawk.
Aizawl West Joint YMA huam chhungah hian branch pasarih – Dawrpui Vengthar, Chawnpui, Dinthar, Hunthar, Kanan, Vaivakawn leh Zotlang an awm a, infiamna discipline hrang hrang – badminton, basketball, tug of war leh thil dangah inelna neih niin, a pum puiah Kanan Branch YMA an champion a ni.