Aizawl: MPCC chuan thuchhuah siamin BJP hruaitu lawk leh Union Home Minister Amit Shah programme-a zirlaite teltir chu thil inhmeh lo tak a nih thu an tar lang.
Inrinnia an thuchhuahah Shah-a programme-ah Aizawl khawpui chhung college zirlaite leh Mizoram University zirlaite tel tura MNF sorkarin thuchhuah khauh tak a siam hi hriatthiam harsa an tih thu an sawi a. College zirlaite leh university zirlaite hi zalenna ngai hlutu, dan hnuaiah zalen taka duh duh sawi theihna (freedom of speech & expression) chawisang duhtu an nih avangin India ram democracy lungphum sawi thiat mektu, BJP pachal, Shah programme-a tel tura thupek an ni hi thil inhmeh lo taka an ngaih thu an sawi.
“MNF sorkarin thahnemngai taka Shah-a programme-a zirlaite tel tura thuchhuah a siam hi Central BJP leh MNF inmawngzawm nghehzia tilangtu a ni a. Mizoramah MNF leh BJP te hi inhaw awm em emin lang thin mah se, lang lo lam, Mizo mipuite hmuh phak lohah thuk takin an thawk dun tih a lang chiang hle,” an ti.