Union Home Minister Amit Shah-a’n Inrinni khan Mizorama hmasawna hnathawh zawh tawh a hawn bakah hnathawh tur dang project paruk lung a phum a; union home ministry, Assam Rifles leh Mizoram sorkarten inremna thuthlung an neih angin Assam Rifles Bn Hqrs chu tuna an awmna hmun atanga sawn chhuah a ni dawn niin a sawi.
Union home minister hian Inrinni khan lehlangin Mizoram a tlawh a, Sipai Lammualah hmasawnna hnathawh zawh tawh a hawn bakah hnathawh leh tur te lungphum a phum a, hnathawh zawh tawh a hawn zinga langsar ber chu Zokhawsanga Assam Riffles Battalion Hqrs Complex thar a hawn chu a ni.
Shah chuan Aizawl khawpui laili atanga Assam Rifles te sawn chhuah a tul thu chu Chief Minister Zoramthanga, Mizo mipui leh BJP party-ten a hnenah an thlen tawh thin tih a sawi a. Sipai luah ram chu Aizawl khawpui than zelna atan hmun pawimawh tak a nih avangin union home ministry, Assam Rifles leh Mizoram sorkarten inremna thuthlung an siam angin Aizawl atangin Assam Rifles Bn Hqrs chu sawn chhuah a ni dawn tih sawiin, “Sipai chhuahsan tur ram chu mipui tan tangkai taka hman a ni dawn a, Laldenga Ventre pawh din a ni dawn,” a ti.
Union home minister chuan Mizoram chu state lian ni lo mah se hmasawnna chak tak a thleng chho mek niin a sawi a. Ram buai thim tak ata zalenna a neih tak dan chu ram dangte tan entawntlak niin a sawi.
Hmasawnna hnathawh leh tur lungphum an phum zinga inkalpawhna kawng sialna tur project pali chuan ram thenawmte nena insumdawn tawnnaah nasa takin hmasawnna a thlen dawn tih Shah chuan a sawi a. Mizoramin leilung hausakna a neih hrang hrangte hai chhuah a nih theih nan central sorkarin theihtawp a chhuah zel tur thu pawh sawiin, PM-DevINE kaltlangin Mizoram chu hmasawnna atan sum tam tak pek a ni tawh tih sawiin, ni zung chakna, mau leh tourism-te chu Mizoram hmasawnna tura tangkai nia a hriat thu leh hemi kawngah hian tan lak thar a tul thu a sawi bawk.
Chief Minister Zoramthanga pawhin Assam Riffles Hqrs., thar hawn a ni ta chu lawmawm a tih thu leh Mizo mipuite tan ni chhinchhiahtlak tak a nih thu a sawi a. Sipai chhuahsan tur rama Laldenga Cultural Centre an sak turah mipui 10,000 an len theih dawn thu leh programe lian leh pawimawh neih nan a tangkai tur thu a sawi.
Union home minister-in a hawn takte hi Rs. vbc 163.237 senga Zokhawsanga Assam Riffles Battalion Hqrs Complex leh thil pawimawh hrang hrang siam te, Rs. vbc 19.88 senga Champhai Keilungliah tuikhuah leh recreation centre siamte, Rs. vbc 10 senga Aizawl-a Lianchhiari Rûn sak te, Rs. vbc 2.74 senga Bairabi-a warehouse sak leh Smart City project hnuaia Rs. vbc 119.2 senga Integrated Command & Control Centre sak te a ni a, project thawh zawh tawh a hawn zawng zawnga sum sen zat Rs. vbc 315.57 a tling.
Heng bakah hian Rs. vbc 193 senga Aizawl-a Laldenga Centre sak tur te, Rs. vbc 2.70 senga Aizawl-a warehouse sak tur te, Rs. vbc 71 senga Dapchhuah atanga West Phailang panna kawng tihchangtlun tur te, Rs. vbc 781.85 senga Zorinpui – Longmasu kawng laih tur te, Rs. vbc 329.70 senga Aizawl by-pass road package 1 leh Rs. vbc 720.72 senga Aizawl by-pass road package 3 siamna tur lung te a phum bawk a ni.