Paris Saint-Germain in league title lak tuma hmalam an panna kawng a tluang vek lo. Olympique Lyonnais nen inkhelin 1-0 in an tlawm.
Pathianni zanah Parc des Princes-ah Lyon an mikhual a, PSG hma a dingte hi tun season a che tha tawk lo team an ni.
Paris khaw club pawh hian season chawhma lam hmang tha hle mahse kuminah chetsual an nei ngun a. French Cup leh UEFA Champions League-ah te an tla tawh.
Lyon hian second half minute 56-naah Bradley Barcola hmangin goal an khung a. Hei hi PSG in sut tawh lovin tun season-ah league inkhelah a vawi nga nan an tlawm.
Lyon hian inkhel tan tir lamah penalty an hmu a, Gianluigi Donnarumma chuan Alexandre Lacazette ti tlu in French forward hian goal ban a pet per a, goal-ah a khung thei lo.
PSG manager Christophe Galtier chuan inkhel zawhah, “A tir minute 20 chhungin kan khel chhe lo, mahse a hnuah ball an chan khan keini lamin tihsual kan nei leh thin. Tihsual kan neih zeuh zeuh khan kan inrintawkna a tihniam a. Nidanga kan insiamthat theih anga insiamtha turin kan rilru a huaisen tawk lo.” tiin a sawi.
Inkhel dangah Lille in Remy Cabella leh Edon Zhegrova goal hnih khung hmangin 3-1 in Lorient an hneh a, pahnihnaah an inhlangkai.