- Zirsangkima
‘Chhai Lai Di’ ni thin na nã nâ, ‘Chhai thin Di Hlui’ han intih ngawt mai chu le? He hla, “The Girl From Yesterday” hi a phuahtu ber Glen Frey khân, a hla ngaithlatute zawhnain min zâwt tluan vek a—a hla awmzia tak pawh hriat thiama man thiam a har ngei mai!
Hla Phèna Mi Pahnihte Chanchin
Kum 1983-ah Texas-ah The Eagles founding member, an zaitupa ber pakhat, Glenn Frey chuan a nupui hmasa ber Janie Beggs chu a nei a; mahse, kum 1988-ah an inthen leh. An inthen atanga kum hnih hnu lawk, kum 1990-ah Frey hian a thih thlenga a nupui ni ta Cindy Millican nèn inkawp lehin kum hnih chhúng an ‘indì’ hnuah inneih thu an tiam ta a ni. Kum 2016, January thlaa Glenn Frey thih thleng khán innei zuiin fa pawh pathum an ni.
“The Girl From Yesterday” a phuah chhan nia ngaih chu a nupui hmasa zâwk Janie Beggs hi Glenn Frey nèn an inneih hma atangin an lo inhnîmhnai hle tawh niin an sawi a. Chutih laiin an inthen hnu erawh hi chuan an chincháng hriat a ni zui lo a; an inthen chhan tak pawh, mumal taka hriat theih a ni lo!
He hla hi Glenn Frey leh a hla phuahpui ber thin Jack Tempchin nèna an phuah dun a ni na chungin; a hla thu kalhmang erawh hi chu Glenn Frey-a’n a tak ngeia a thil tawn atanga a phuah chhuah niin a lang.
Jack Temchin hi hla phuah thiam leh musician ropui a ni ve hrim hrim a. The Eagles hla hit, “Peaceful Easy Feeling” pawh kha a kut chhuak niin a bîkin Country artist tam tak— George Jones (“Someone That You Used to Know”) te, Emmylou Harris, Randy Meisner te sak làr, “White Shoes” te, Glen Campbell-a “Rollin” te, Patty Loveless-i hla, “To Feel That Way at All” te leh Tanya Tucker-i hit-pui, “Somebody Trying to Tell You Something” te pawh lo phuah tawhtu a ni.
The Eagles kha kum 1980 atanga kum 1994 chhúng band an keh darh/inthen a. Chumi chhúng chuan Glenn Frey hian rimawi khawvêl chawlhsan chuang loin Jack Tempchin nèn hla eng emaw zât an phuah dùn thìn—chûng zínga pakhat chu he hla, “The Girl From Yesterday” hi a ni.
1994-ah The Eagles band din thar leh a nih khán album hlawhtling tak, Mizote paw’n an band kan duh thar leh êm êmna, “Hell Freezes Over” chu live recording-in an ti chhuak a. Chuta an hla hrang hrang zíngah chuan, “The Girl From Yesterday” pawh hi a hit páwl a rawn nih kha.
Zêldin Ngai Hla Chu!
Glenn Frey hian a nupui hmasa Janie Beggs hi a awmpui ni ngeiin a lang. Sap puiho khu chu Mizo te leh tribal dangte ang an ni ve lo a; mahnia intungdingin kawppui/ ngaihzáwn an neih paw’n an khawsakpui mai thìn. A hmeichhe in emaw a mipa inah pawh awm dùn se—mawi loah an la ngai lo. Chutiang chuan, an chanchin fiah lo ruai han chhiar hian, Glenn Frey hian Janie Beggs hi a awmchilh ni ngeiin a lang. Tin, a hla thu atang rêng rêng paw’n, Janie hi Frey-a ina khawsa a ni thei lo hrim hrim bawk!
The way they said goodbye!
Inthen thu sawi dàn te hi … pangngai takin, tha leh tluang taka inhrilh dàn a awm ve a. Hetia, intháwng taka han inmang tha teh thlâwt hi chu, a tuartu tán chuan a na ve duh thlâwt alãwm!
Eng mah inthen chhan mümal awm loa han inthen tâk ngawt zawng—a va’n na dáwn tak! Sawi lâwk awm loin, tiam lâwk pawh awm chuang loin—an han in ‘mang tha’ ta ngawt mai si a le! ‘In-mang tha dàn chhe ber chi’ a ni hial ang chu!
Léng dùn a, tual chai dùn a, mu dùn a, khawsa dùn a, inthen ní sawi ngai loa khawsa thìnte chuan, eng emaw ‘chhan eng emaw tak’ avàngin then zai an han rél thut ta rup mai si a le! Mak tak a ni—mak tak hi a ni ringawt!
An in-goodbye dàn chu maw—chhan awm hran loa in-goodbye an ni satliah ve mai … maithei! Inliamsana intawng leh ngai tawh lo tùra inmang thain, in-goodnight satliah loin an in-goodbye ta a ni ta ve ang chu!? Eng nge an inthen chhan lah, keini zu hriatpui zawhzai chî ni miau hek lo le!
He packed his things, walked out the door
Glenn Frey leh Janie te hi—an inngaihzàwn laia an inzui chhiar tel loin kum nga chhúng an innei (1983–’88) a. Ziaktu pakhat chuan, a tìr lama hlim taka an awm dun thin thu a ziak a; mahse, kum nga chu an daih chang chang chauh a ni!
Chutah, a mipa zâwk chuan, khawvêlin a hriat leh tawh ngai loh tùr, an inkára chhan eng emaw tak avàngin a kalsan ta hmak mai si a le! A insiam a, páwn a chhuahsan hmak mai!
Hemi chianna chu, Jannie Beggs-in eng mah Frey nèna an inthen chanchin, social media leh TV interview-na lam zawng zawngah a thup tlat a ni! Eng tak chu awm ang maw le? Janie tawng chhuah hma chuan he hla thu famkimna hi khawvêlin a hre ngai dáwn lo a ni; amah chhuahsantu Frey lahin fam changin khawvêl min chhuahsan tawh bawk si a!
La hmangaiha la thlahleltu tán chuan, eng emaw tak chu sawi fel a châkawm viau ngeiin a rinawm! A na lutuk kha a tap thei lo hial ni tùr a ni. Chu achhapah ‘Chhai Di Hlui’ nihna a’n chelhtír mai kha, hmeichhe tú tán pawh, a ná ang a, hriat thiam pawh a harsa ngei ang.
Chû, ‘Kan pa’ a tih teh fo Frey chuan, hmun hlâa zin vang vang tûrin air ticket a’n lo la fel vek tawh mai si a. Ram hlâa a zinna tùr ti felin, thlawh chhuah mai inringin a thawmhnaw zawng zawng nèna a’n in-pack mawlh mawlh hnuah, ram hla pan tùrin a in-ready vek tawh hi a lo ni a! Eng vàng tak kher kher chuan nge ni ang maw le aw…!
Engah nge a thlà a thlà, a kuma kum, ‘Kan nu’ tia a chhàl ngam chhuahsan chu a phùr viau ni ang le? Engah nge air ticket chu a lo va lâk thawt thawt chhan? Enga ti nge nupui anga a en chu kalsan a phùr viau a?
Chûng zawhna chu, chhàn theih zawhna—chhan nei si a ni ngei àwm si a le! A chhànna chhan tùr ber lah chu, keini—he hla ngaithlaa lo tuipuitute hriat phâk va ni suh le!
Glenn Frey chuan a kalsan tâk Janie Beggs—lungngaih leh lunglèn fàwmtu chu—an làwi dun thinna, an hlimna rún riang tê chu a lo bèl ve a, a hnaih ber thin, a kiang atã hla ngai lo chuan, a rilru leh a thinlung leh a taksa chu, hla te khuaah a thangbopui dáwn daih ta si! Tin, atána na ber tùra ka rin chu—‘Chhai Di Hlui’ tia koh tùr a nih tawhna chu a ni!
…She couldn’t cry!
A kalsan tâk nu tán chuan a na thlâwt ang! A na ngawih ngawih a, a na vawng vawng ngei ang—chu nû—nimin nû ni mai tawh tùr tawrh atán chuan—na tak tùr hi a ni!
Chuti teh thuta a’n liamsan ta mai chu! Thil awmzia a’n ngaihtuah ang a; tah zai pawh rél thei loa tap thei lo khawp leh, a mit atä mittui far tùr takngial pawh pai zo lo khawpin a awm ang a—chû tawrhna chu, na ngaih ngaih tak tùr a ni rëng a ni.
Ka hriat thiampui vek lo a; hriat thiampui vek pawh ka tum hek lo; mahse, a tah theih loh chhan—a natna erawh chu ka hriat thiampui ve riai ruaiin ka inhre ve. Kha pâ, amah liamsantu pa, Glenn Frey-a ngei kha, liam miau tawh hek—a kalsan daih tawh miau si a—eng mah sawi lâwk loin!
Because she knows deep in her heart that he’ll be back someday
Mahse, Janie Beggs chuan beiseina mit thei lo a nei tlat—Glenn Frey chu, a kianga a zàl thinna ngeiah chuan a rawn lêt leh ang, tih beiseina chu a nei tlat a!
Tuarna, hrehawmna, natna damdawi chu beiseina a ni!
’Ti khawpa hrehawm tuartírtu kha, liamin kiam tawh mah se, ‘eng tik nîah emaw chuan a la rawn lêt ve ang,’ tih beiseina mei ëng a chhi nung reng thìn a. Chu chuan a tawrhna chu, tlém tè tal paw’n a ti ziawm ve deuh thìn … maithei!
Tah chin tâwk emaw mittui sùrtír chin tâwk hriat loh hnû hian mihring, a tûa-te mai pawh hian beidawnna kan lo hma chhawn fo thìn a lo ni a. Mahse, he nu hi chuan a beiseina, a chhit èn, a tìra êng teng teng chu, nasa lehzualin a chhém alh zêl a; ‘Engtik nîah emaw chuan a la rawn lêt leh ang!’ tia beiseina nèn a nghâk ta fan fan a
…
Liamsantu chu a hlat ngai chuang lo a; kalsantu chu a hnaih tlat a—a tawngtaina leh a beiseina lamah chuan a be tel reng thìn!
Miten ‘dik an tih leh dik lo’ an tih thliar loin a nung nawk nawk a; a beiseina chu a nunpui mai a; ‘Engtik nîah emaw’ tih chu a rilruin a vei a; a veia chu a nunpui mai.
Mihringin beiseina kan neih fan fan chuan, chhia leh tha kan dáwn tawh ngai lo a; pawisak kan nei mawh fo, tih chianna chu he hlaa Janie chan a puan chhuahna hi niin a lang. Frey-a rawn lêt har tawh lutuk a nghahna lama a mit atã mittui súr zur zurte chuan natna a thlen ngei ang a; a thangbo chhúnga a natna te chu, ni tin a chhiar ve ngei thìn ang. A chhan chu, ‘Ka hnênah a rawn kîr leh ang,’ tih beisei meichher a chhit èn tlat vàng a ni.
I Missed Me!
A hla cháng tàwp berah hian Elvis Presley hla sak làr, “Are You Lonesome Tonight,” tih te; Jim Reeves-a “I Misssed Me” tih te leh K Hminga, “Kawtthlêr Khawhar” te kha ka hre chhuak uai uai thìn—Janie Beggs tawn a nih duh hmèl ka ti thìn ngawt mai!
Janie khawhar lutuk chu, a telephone bulah te a’n thu leh ngawt thìn ang a. Eng mah thawm ri-vâ a awm dáwn dèr si lo ang! Elvis iangin:
“Are you lonesome tonight?
Do you miss me tonight?
Are you sorry we drifted apart?
Does your memory stray to a bright summer day
When I kissed you and called you sweetheart?
Do the chairs in your parlor seem empty and bare?
Do you gaze at your doorstep and picture me there?
Is your heart filled with pain, shall I come back again?
Tell me dear, are you lonesome tonight?” a tih ve te ka ring hial thìn nia!
Chutiangin Jim Reeves-a hla ang paw’n:
“I missed holding hands walking out on your lawn
I missed the sweet kiss that was mine for so long
Were you happy with new arms
Wrapped around you so tight
I missed me, how I missed me at your house last night,” te a’n ti ve leh thùl ang a;
K Hminga angin an kawtthlêr, an tual chàina hmun ngai ve tùra ngaihna riak a neih te pawh ka ring rum rum thìn. Mahse, a tàwpah, ‘Hman laia Chhai Hnu’ a ni mai chauh tih a inhriat chhuah chuan, a tah a chhuak thar leh ngei thìn ang. A chhan chu, a phuahtuin, ‘Ka di chhai hnu a ni kumkhua tawh ang,’ (And she’ll always be the girl from yesterday’) a ti tawh miau si a le!
Keini pawh…
Kan tawn chinah kan phun fo mai. Kan dawn chinah ka áng tho—kan läwm chuang lo! Sorkar tin kan dem zêl a—hremzia rëng kan lo ni e!
He nu—Janie, an pa, Glenn Frey thlaha ngawi hmak ang hi kan ang lo! Ani Janie chu, ‘Chhai Di Hlui’—‘Nimin lam Nula’ tia koh hial a ni! Mahse, Janie chuan beiseina nèn a lo kìr leh hun a nghâk tlat mai. Ani ang hian, keini paw’n ram tha zâwk, nun duhawm zâwk, nun nuam zâwk, sorkar tha zâwk hi i beisei ve ang u. Thil tha hi kan tán a bo ngawt dáwn lo tih beisei thiam ve ila. Girl emaw Boy emaw pawh ni ila, from yesterday chu kan ni reng dáwn lo tih rilru hi i pu thar ve teh ang u khai.
Tlipna
Glenn Frey te thian dùnin he hla an phuah chhan hi, chiang taka hriat theih ni lo mah se, a hmeichhia hi a tláwm a, a dáwng a, tahpui tham zetin a na ngawih ngawih a ni. Beiseina nung a nei tih loh chu!
En tawn tùr kan neih chu: He nu hian a thil tawn engkim social media-ah a puang zár lo ngamna lai tak hi a ni. Keini chu, bialnu/bialpaten min then se, kan post zung zung a; mahse Janie Beggs chuan a ti ve ngai lo. A tána hla ná tàwpkhâwk pawh hi, a tawrh zampui thiam. Keini min phuah chhan ni ve dáwn tehrëng ila, kan va’n harsat tláng dáwn tak! A phuahtu Glenn Frey chuan mual a liamsan tawh nachungin, a la puang duh lo! He nun hi entawn tlâk—social media-a innghat lo hringnun tak chu a ni!
Tunge, kumkhuaa “Chhai Di Hlui” nih duh ang le!? La hmangaih nafam chuan chu nihna chu a inpêk a phal ka ring lo a, tú pêk mah pawh a inphal thei lo ang! A thian hnai leh a farnu, a fanu chan ngei atán pawh—‘A lo na êm mai!’ tia hnara hnâwlsak tùr chi-ah ka ngai!
Khatia chhan mûmal pawh awm/sawi loa han inkal bosan vang vang tâk mai te; a lo kìr leh tawh dáwn lo tih hre reng chung a, a lo kìr leh beisei ru chunga phone kianga lo nghaha, tlai ni tlâk ruala a lo kìr leh beiseina them tê nei chunga tukverh atanga lo thlír tlai tin mai kha … kha nun khawhar leh baihvai tak kha—hmeichhe chan atán chuan, thil chhe theih tâwp, thil runthlâk tàwpkhâwk páwl a ni ta ve ang!
Chutah, a mipa zâwkin, ‘Kumkhuaa ka chhai Di hlui!’ tia nihna duhawm lo zet a’n la neihtír zui ta mai te kha…! A va na ngawih ngawih dáwn êm!
The Girl From Yesterday
—The Eagles
Songwriters: Glenn Lewis Frey / Jack Tempchin
It wasn’t really sad the way they said goodbye
Or maybe it just hurt so bad, she couldn’t cry
He packed his things, walked out the door and drove away
And she became the girl from yesterday
He took a plane across the sea to some foreign land
She stayed at home and tried so hard to understand
How someone who had been so close could be so far away
And she became the girl from yesterday
She doesn’t know what’s right, she doesn’t know what’s wrong
She only knows the pain that comes from waiting so long
And she doesn’t count the teardrops that she’s cried while he’s away
Because she knows deep in her heart that he’ll be back someday
The light’s on in the window, she’s waiting by the phone
Talking to a memory that’s never coming home
She dreams of his returning and the things that he might say
But she’ll always be the girl from yesterday
Yeah, she’ll always be the girl from yesterday