Indian wrestler-te chuan Delhi-ah sorkar hnuaia awm wrestling pawla an hotu ber chu mipat hmeichhiatna kawnga an laka che mawi lova puhin man phutna an lantir nawn leh.
Wrestler-te hian January khan he thil hi lo au chhuahpui tawhin sorkar pawhin an thu thlente chu chhui ngei a lo tiam tawh.
Athlete-te hian Wrestling Federation of India (WFI) chief Brij Bhushan Singh leh thuneitu dangte chu kum eng emaw zat chhung hmeichhe wrestler lakah mawi lo takin an che thin niin an sawi.
Singh-a hian an puhna hi nasa takin a pha.
January-a lungawi lohna an lantir kha khawvel pawhin a ngaihven hle a. A hun lai khan WFI chuan wrestler-te thil sawi chu a dik loh thu leh mipat hmeichhiatna kaihhnawih thil phei chu a thleng lo hrim hrim niin an sawi.
Nawrna an lantir zui zel avangin sorkar pawhin Singh-a chu a nihna atanga hun eng emaw chen lo chawl rih turin a ti a, a chhuitu tur panel pawh a din zui a. Chawl tura tih hnuah hian eng ang chiahin nge chawlhtir a nih hriat a ni lo va, WFI website-ah pawh president tiin a la inziak reng.
Indian Olympic Association pawhin rorel lai MP Singh-a puhna chhuitu tur a din a. Committee chuan a thil chhui report pawh April khan an thehlut a; mahse, an hmuhte puanzar a ni lo.
Wrestler-te hian Pathianni atang khan Singh-a man phutna an tilang tan leh ta a. Hmeichhe athlete pasarihin police-ah complaint an thehlut thar bawk a, mipat hmeichhiatna lama an chunga mawi lo taka che leh mi tihhlauh tumah an puh a ni.
Sorkar chu a chhuitu tura an tih panel-in an hmuhte puan zar ngei turin an phut bawk.
Pathianni zan khan World Championship medallist vawi hnih lo ni tawh, Vinesh Phogat chuan thil phut lantirtute pawna an mu lai thlalak Twitter-ah a pho chhuak.
“Podium atangin kalkawngah! Zanah pawn boruakah dikna beiseiin,” tih a tar lang bawk.
Olympic medallist Bajrang Punia leh Sakshi Malik te pawhin lungawi loh lantirna hi an zawm ve bawk.
Phogat-i hian January khan hmeichhe wrestler 10 velin Singh-a hian mipat hmeichhiatna hawiin a tibuai tawh tih a hnenah an thlen tih a lo sawi tawh a. Singh-a hi a nihna atanga chawlhtir a nih hma chu international tournament-ah an tel tawh dawn loh thu a sawi.
Phogat-i hian a hmain ‘a hunah tak’ police hnenah wrestler-te hian thubuai an thehlut dawn tih BBC a lo hrilh tawh bawk.
Mi thiamte chuan tuna wrestler-te lungawi lohna leh an thil phut chu a chhan a tha hle niin an ngai hlawm a, hetianga a huhova infiam mite inlungruala thuneihna hman dik loh chungchanga an chet chhuah hi a vawi khatna a nih thu an sawi bawk.