Kum 2008-a firfiakten Mumbai khawpui an beih thut tuma inhnamhnawih ngeia puh, Pakistan mi, Canada-a sumdawng, Tahawwur Rana chu India rama a chungthu rel a nih theihna turin US hnenah thuneituten an dil mek a ni.
Biden-a hnuaia roreltute pawhin India dilna hi federal court hnenah phalsak mai turin an nawr ve mek bawk.
Assistant US Attorney John J.Lulejian chuan Los Angeles-a US federal court hnenah Rana chu India rama a chungthu rel a nih theihna tura tehkhawng awm zawng zawngte a tling vek niin a sawi a. February 4 khan Rana-a attorney chuan India rama thawn an ngiatna hi a dodal thung.
Kumin May 22 hian Rana chu India sorkar hnena hlanna tur chungchang Los Angeles-a US District Court Judge Jacqueline Chooljian hnuaiah ngaihtuah that leh a ni ang.
David Coleman Headley-a nena naupan tet atanga inkawm tawh, Tahawwur Rana hi Los Angeles-ah June 10 khan man nawn leh a ni.
Kum 2008-a firfiakten India sumdawnna khawpui an beih tuma mi 166 thihnaa inhnamhnawiha puh a ni a, hemi tum hian American mi paruk lai an thi tel.
Mi 239 an inhliam a, US dollar tluklehdingawn 1.5 man hu thil tihchhiat a ni bawk.
India chuan raltlan angah a puang a ni.
India-US Extradition Treaty hnuaia India sorkarin Rana thawn tura an ngenna chu US chuan pawmin chin fel ngaite an buaipui mek a. Lulejian chuan India dilna tehkhawng zawng zawngte chu a pawmawm vek niin a sawi.