India-a Kuno National Park, Madhya Pradesh-ah thla khat pawh tling lo chhungin cheetah pahnih a thi ta.
Forest thuneitute chuan kum ruka upa cheetah pa hi a thih chhan tak an la hriat theih loh thu an sawi.
Zawhte lian chi hi February thlaa South Africa atanga an lak luh 12 zinga pakhat a ni.
India hian kum 70 chuang liam tawha a rama awm tawh lo cheetah hi awmtir leh tumin nikum khan ram dang atangin a la lut tan.
March 27 khan a nu pakhat, Namibia atanga an lak luh zinga mi chu a kal tha lo avangin a lo thi tawh bawk.
India-a cheetah awm thartir leh tuma beihna hian mi tam tak a tiphurin sorkar pawhin a bei nasa a, thil thleng hlek apiang chu chanchinbu luahtu lian a ni zel.
Namibian cheetah pariat, a pa panga leh a nu pathum an lak luhte hi nikuma India thlenpui a nih hlim pawhin lawm a hlawh hle a ni.
February khan South Africa atangin cheetah dang 12 lak luh leh an ni a. Kuno-ah hian quarantine zone-a hun rei tak khawsaktir phawt niin a hnuah ram hnuaiah chhuah thin an ni a. Forest thuneitute leh doctor rualin an chetla zawng zawng an vil reng.
March 29 khan September thlaa Namibia atanga lak luh zinga pakhat chuan no pali anei a. Environment Minister Bhupendra Yadav chuan hei hi puangin ‘hun chhinchhiahtlak’ a nih thu a sawi.