Sudan-a sipai chi hnihte thuneihna inchuha an khawpui, Khartoum-a an indona avangin ram dangte chuan an mite an hruai haw mek a, mi cheng maktaduai tel chu pawn chhuak ngam lovin inah an tawm a, tam takin tui leh ei tur an tlachham tawh.
April 15 atanga army leh Rapid Support Forces (RSF) paramilitary group inbeihna avang hian nunau an buai hle tawh a, mi 420 vel thi awm tawhin in leh dawr kang, rawk leh hal a tam hle.
Kartawpah khan mi tam takin an chhuahsan a, ram dang sorkarte chuan thlawhna tir lutin Khartoum atanga an mite hruai chhuah hna an thawk mek.
United States chuan special force-ten MH-47 Chinook helicopter hmangin Sudan-a indona hmun hi Djibouti-a an hmun atangin an pan a, mi 100 tling lo hruai chhuah nan darkar khat vel hun an hmang tih an sawi.
United Kingdom Prime Minister Rishi Sunak chuan Pathianni khan an sipaiten ‘ British palai leh an chhungte chu him takin Sudan atangin an hruai chhuak’ tih Twitter-ah a tar lang.
Germany leh France pawhin Pathianni khan an mite hruai haw hna an thawk tan tih an sawi ve ve a. Europe ram dang – Italy, Netherlands leh Greece te pawhin ruahmanna an siam mek tih an sawi bawk.
French President Emmanuel Macron chuan mi 100 chuang phur French thlawhna chu ‘Djibouti-ah a tum’ tih sawiin an hruai chhuahte hi ram hrang hrang an ni tih a sawi a. Pathianni zan khan thlawhna dang, mi 100 bawr vel phur pawh a tum belh leh bawk.
Sierra Leonean hruai chhuah pakhat chuan UN lirthei leh bus eng emaw zatin Khartoum chhuahsanin khawchhak lam, Red Sea kama Port Sudan an pan tih a sawi a. Lirthei hian km 850 zeta hla niin ‘ram hrang hrang mite an chuang’ niin a sawi.
Turkey pawhin an mite hruai haw hna hi Pathianni khaw var hma atang han chhim lama Wad Madani atangin lirtheiin a tan a; mahse, Khartoum-a an innghahkhawmna bul mosque-ah thil puak a awm avangin an tikhawtlai leh rih niin embassy chuan Twitter-ah a tar lang.
Khartoum atanga Italian air force C-130 thlawhna pawhin Pathianni zan khan Djibouti air base a thleng tih an ram defence ministry chuan a sawi a. Thlawhna dang, ambassador leh hruai haw hna thawhnaa tel sipaite phur pawh a thlawk kir leh dawn niin an sawi.
Mi 100 chuang phur Spanish sipai thlawhna pawhin Khartoum a chhuahsan a, hetah hian Spaniard 30 bakah Portugal, Italy, Poland, Ireland, Mexico, Venezuela, Colombia leh Argentina mite an chuang niin foreign ministry chuan a puang.
Jordan pawhin thlawhna pali chu Amman military airport-ah tumin Port Sudan atanga hruai chhuah Jordanian 343 an chuang tih a sawi.
Sudan-a a mite 10,000 chuang awm mek, Egypt chuan Khartoum chhuahsanin Port Sudan leh Wadi Halfa-a consular office pan khawm turin an hriattir tih sorkar enkawl MENA news agency chuan a puang.
Inrinni khan Saudi Arabia chuan mi 157 an hruai haw thu an puang a, an zingah hian Saudi 91 leh ram dang mi an tel a. Saudi sorkar TV chuan car leh bus hmanga Khartoum atanga Port Sudan pan lai video a tichhuak a, hetah hian navy lawngin nghakin Saudi lawngchawlhna, Jeddah an panpui dawn a ni.
Ghana, India leh Libya pawhin an mite hruai haw turin hma an la mek a, Russian Ambassador to Sudan Andrey Chernovol pawhin Khartoum-a Russian zawng zawng deuhthawin Russian embassy building an thleng khawm tawh tih a sawi.
“Russian-te hruai haw theih dan tur hi kan dap mek a ni,” a ti.