Aizawl: MZP-in social media-a Zofate inpumkhatna tichhe thei zawnga thawm awmin an rilru a tihnat thu sawiin, “Zofate inpumkhatna duhtu tawh phawt chuan na an tih ngei a rinawm,” an ti.
MZP chuan, “Hmun hrang hranga Zofate hian hmun danga kan unaute kalphung leh inkaihhruaina te, an dan leh hraite kan inngaih pawimawhsak a ngai,” an ti a. “Hmun danga kan unaute zinga kan awm pawhin an duh dan te, an dan te ngai pawimawha kan zah thiam a ngai a, chu chu kan inpumkhatna kawnga thil pawimawh a ni,” an ti.
“Zofate hi kan duhthu ni lova thendarh kan ni,” tiin MZP chuan, “Sorkar pathum hnuaiah kan ram leh mipuite hi kan awm mek a, sorkar hran hnuaia awm chunga kan inpumkhat theih nan MZP-in theihtawp a chhuah thin a, MZP leh nationalist pawl leh mi mal tawh phawt chuan hmun danga mite hi ram dang mi enin an en thei lo va. Hmun hrang hranga Zo hnahthlakten chutiang rilru chu pu se tih hi MZP duh dan, tun hma atanga a lo aupui thin a ni,” an ti.
Tunlaiin khawchhak lam leh khawthlang lam atangin Mizoram state-ah Zohnathlakte an raltlan tih sawiin MZP chuan, “Sorkar leh mipuiin tha taka kan lo dawngsawng hi a lawmawm takzet a ni,” an ti a. Raltlante leh hmun dang atanga Mizorama lutte pawhin Mizoram state kalphung leh dan leh hraite ngai pawimawh se, Mizoram state mipuite zah thiam se an duh thu sawiin, “Chu chu kan inunauna atan a pawimawh a ni tih hi MZP ngaihdan a ni,” an ti bawk.
Zofate inpumkhatna tichhe thei zawnga che lo tura insum hram hram turin MZP chuan hmun hrang hranga Zo hnahthlakte an ngen thu an sawi bawk.