Sorkar pawisa kum liam ta 2022-2023 khan Mizoram Rural Bank (MRB)-in Rs. vbc 65.19 hlep a nei a. Kum hmasa 2021-2022 a an hmuhchhuah Rs. vbc 49.44 niin, a hmuhchhuah punna zaa 32.06 a ni.
MRB Chairman V Jayachandra-a’n nimin khan a pisa-ah thuthar thehdarhtute kawmin sorkar kum liamtaa MRB dinhmunte a hrilh a. MRB chu nasa taka a than thu sawiin, kum hmasa aia an thanna pawh zaa 16.80 a nih thu leh an sum che vel pawhin Rs. vbc 7861.57 a kai tawh thu a sawi.
Sorkar kum kalta chhung khan MRB-in Corporate Social Responsibility (CSR) atangin Rs. vbc 1.81 an pekchhuah thu pawh MRB chairman chuan a sawi a. MRB-a account nei mi 9,66,580 an awm mek thu sawiin, hei hi Mizorama mipui awmzat atanga chhutin a tam thu leh Mizo mipuiten MRB-ah rinna an nghahzia tilangtu a nih thu a sawi.
MRB chairman chuan Mizo mipuiten MRB-a pawisa an dah chuan a hlawkna teltu pawh Mizoram tho a nih thu sawiin, an hnena sum dahte chu Mizoram chhung veka vir vel a nih avangin bank dang nen an inang lo niin a sawi a. Bank dangte hlep leh hlawknate chu state pawnah nasa taka a luanchhuah thu a sawi.
MRB hian branch 102 leh thawktu nghet 477 bakah a nghet lova thawk mi 300 dawn an awm mek thu chairman chuan a sawi a. Kum kalta khan Electric Veng, Aizawl-ah leh Tawipui South-ah te branch thar an hawn thu leh Salem Veng, Aizawl-ah branch hawn mai theih tura an peih fel leh tawh thu a sawi bawk.