Aizawl : Zirtawpni khan Congress party-in an pisa-ah political session an nei a. He hunah hian MPCC Vice President Lal Thanzara’n thu sawiin, ZPM in BJP malsawmna an dawn theih thu a sawi a. ZPM hian BJP sum leh pai tanpuina an dawng a nih pawhin Congress mipuite tan zamna tur a awm lo tih a sawi.
Lal Thanzara chuan Mizoramah MNF dinhmun a hniam em avangin Congress party suih tet nan BJP hian MNF hi rintlakah an ngai tawh lo tih sawiin, “Chuvangin, he BJP malsawmna hi ZPM lamin an dawng lo ang tih a sawi theih loh. Congress party tihtlak nan BJP hian tih hreh an nei lo va, chutih rualin sorkar siam ve hrim hrim tum ZPM hian BJP sum leh pai tanpuina an dawng chak khawp ang. Hetiang hi a lo thleng a nih pawhin Congress mipuite tan zamna tur a awm lo, BJP lama tan aiin Pathian lama tan a hlawk zawk,” a ti.
MPCC Vice President hian sakhaw dang rahbeh tumtu BJP rorelna hnuaiah Kristian Missionary-te an him lo niin a sawi a. Hindu lal ram din tumtu BJP hi Kristian-te tana an hnawksak zia hretute chu Kohhran mipuite an nih thu a sawi a. Hei hi Mizoram chhunga Kristian mithiamte pawhin ngaihven lehzual se a duh tih a sawi.
Congress party chu sakhaw tih bik nei lo party an nih thu sawiin Lal Thanzara hian, “Nekchepna tuartu Kristiante tawngtaina hi Pathianin a la chhang ngei ang. Chutih hunah chuan India ramah sakhaw zalenna hi tun dinin a awm leh ang. India rama Kristian te’n harsatna an tawhin Mizoram Chief Minister thin Pu Lal Thanhawla kha an thlamuanpui thin hle,” tiin, BJP thawhpui chief minister Zoramthanga kaihhruai MNF erawh India ram Kristiante thlamuanpui thamin tun thlenga an la chet loh thu a sawi bawk.