Aizawl : Mizoram sorkarin mipuite chhinchhiahna tura dan a duan ‘The Mizoram Maintenance of Household Register Bill, 2019’ chu a taka hman thuai tha an tih thu Mizo Zirlai Pawl (MZP) in Larsap Hari Babu Kambhampati an sawi pui.
MZP hian nimin khan Larsap hi a chenna Raj Bhavan-ah an kawm a. An inkawmnaah hian MZP hruaitute chuan ‘the Mizoram Maintenance of Household Register Bill, 2019’ hman thuai tha an tih thu Larsap hnenah hian an sawi a. Larsap chuan President office lam atanga zawhna Mizoram sorkara mawhphurtu official te’n an chhan hunah President office atang hian Raj Bhavan lamah a rawn kir leh turah a ngai tih a sawi.
MZP hotute chuan tun hnaiah Mizoram University chhungah zirna kaihhnawih thil ni lo, politics lam thil program huaihawt leh mikhual te thleng an awm thin niin sawi chu tha an tih loh thu an sawi a. Hemi chungchangah Larsap chu lo ngaiven a, lo en zui turin an ngen bawk.
Larsap an kawmnaah hian MZP President Lalnunmawia Pautu, Vice President Andrew F. Lalramnghaka, General Secretary Jacob Lalmuanpuia leh NESO Vice Chairman Ricky Lalbiakmawia te an tel a ni.