Aizawl : Health Minister Dr R Lalthangliana chuan Mizoram hmun tam zawkah malaria natna umbo mai thei dinhmunah a ding tawh niin a sawi.
Union health Minister Dr Mansukh Mandaviya hoa nimina New Delhi-a Asia Pacific Leaders Conclave on Malaria Elimination neihah khual zahawm niin Dr R. Lalthangliana hian thu a sawi.
Dr R Lalthangliana chuan Mizoram chhunga health department hnuaia district then hran pakua te zinga panga chu malaria umbo mai thei dinhmunah a ding tawh tih a sawi a. District pali – Lunglei, Lawngtlai, Mamit leh Siaha ah te chuan malaria vei kum tinin an la awm thin a, hmasawnna chak zawk neih theih nan National Vector Borne Disease Control Programme (NVBDCP), New Delhi kaihhruaina hnuaiah Mizoram sorkarin hma chak takin a lak mek thu a sawi.
A bikin Malaria tamna hmun district pali-ah chuan IRS (DDT kah), LLIN (Thosilen chiah sa) sem leh IEC/BCC activity hrang hrang, state leh district task force bakah NGO leh kohhran pawl hrang hrang te nen tang hovin theih tawp chhuaha hmalakna kalpui mek a nih thu a sawi a. Mizoram chu malaria vei hmuhchhuah kawngah India ram chhunga thisen exam rate sang ber a nih thu leh sub-centre awm lohna khua-ah pawh khaw tinah malaria vei hmuhchhuah tuma hma lak a nih thin thu leh malaria veite enkawlna pek vek a nih thu Health Minister hian a sawi bawk.
Asia Pacific Leaders Conclave on Malaria Elimination hi Union Ministry of Health & Family Welfare leh Asia Pacific Leaders Malaria Alliance (APLMA) tang dunin an buatsaih a ni a. He hunah hian Indonesia, Malaysia, Solomon Islands, Fiji, Cambodia, Sri Lanka, Nepal, Thailand, Myanmar leh state thenkhat atanga Minister te’n thu an sawi a ni.