A dawn kir leh ang a, a lung a leng vawng vawng ngei ang. Tun atang chuan ‘Carpool Karaoke’ mangtha a ngai ta a, James Corden-a’n he programe hnuhnung ber hi Adele a hmanpui.
The Late Late Show host leh Adele te hi Los Angeles-ah in hmu in, Corden chenna In-ah cymbal ring mangkheng hmangin a mu lai kaihthawh a ni a, Adele lung ti tawi turin CBS studios lam pana car-a phurhchhuah a remti ta a, ‘Car khalh thiama hriat chu ka ni miah lo aw..’ tia bul tanin, zinkawng duhawm chu zai leh lamin an zawh tan.
He hun tawi te ah hian an inthianthatna te an sawi uar dun hle a, UK lama kirleh tura inbuatsaih mek Corden tan mittui dan hleih theih pawh a ni lo. A hun kal tawh leh liam ta a ngaihtuah let rauh rauh ang a, hming a chherna leh a larna huang a kalpel tur chu hriatthiam harsa a ti hle bawk ang.
“Kum riat tal tak meuh a ni ta a, a mak hle mai. Mit khar kar leh a tih theih laiin, helai hmuna ka lo thlen hmaa hringnun te kha nghilh ta duak angte’n ka inngai thul,” a ti.
Adele pawhin, “Los Angeles hi ka nghawng lenna hmun a nih loh vangin min lo hrethiam mai teh u.. ka lai deuh tut mai. Zep lovah chuan.. very very sad,” tiin a sawi ve bawk.
Kum 2015 a The Late Late Show a rochun tum khan US TV en thinte’n Corden hi an hmel hriat lo hle a, Scottish-American comedian Craig Ferguson thlaktu ni bawk hi chuti teh vakin an bengkhawn hran lo.
Mahse, ngaihtuahna thar leh dangdai vawrhchhuah a thiam riau mai a, ‘Carpool Karaoke’ a’n buaipui chho chiah mai chu namen lova hit zuiin, Adele nen 2016 khan bul an tan ta a, video viral nasa ber a ni zui nghal.
Tun thleng hian khami tuma Adele nen ‘Carpool Karaoke’ an neih khan view maktaduai 260 chuang a nei tawh a ni.