India-a sports ministry chuan an hnuaia wrestling enkawltu pawlah kal dan fuh tawk lo a awm ngei tih a puang ta a. Hei hi Indian hmeichhe wrestler-ten Pathianni atanga anmahni enkawltu pawl hotu laka lungawi lohna an lantir hnua a puan a ni.
Wrestler langsar tak takte hian Wrestling Federation of India (WFI) chief Brij Bhushan Singh chu hmeichhe wrestler laka mipat hmeichhiatna lama mawi lo taka chea puhin chawlhtir an phut.
Singh-a erawh chuan an puhna a pha thung.
Ministry pawhin he boruak kal mek chungchanga Indian Olympic Association (IOA) hnena lehkha a thawnah mipat hmeichhiatna lam a ziak lang lo.
Wrestler lungawi lote hian Supreme Court-ah pawh petition thehlutin Singh-a lakah thubuai siam dan an dap.
WFI chief lakah hian hmeichhe wrestler tam takin complaint an thehluh hnuah pawh police-in a lakah thubuai engmah an la siam lo niin an sawi a, mipat hmeichhiatnaa mawi lo taka an laka che leh mi vau ching angah an puh a ni.
Thawhlehni khan court sang ber pawhin petition hi ngaihtuahin ‘thil serious tak’ a nih thu a sawi a, Delhi police chu engvanga Singh-a laka thubuai ziak lut lo nge a nih sawi fiah turin a ti.
IOA President PT Usha chuan wresler-te lungawi lohna hi an pawl chuan Ninganiah an ngaihtuah dawn tih a sawi a, ‘tuna WFI buaina felna tur hmalakna tur thutlukna’ an siam tur thu a sawi.
India-a infiammi langsar tak takte hian Delhi-a hmun lar tak, Jantar Mantar-ah Pathianni atang khan lungawi lohna an lantir mek.
Pathianni zan khan World Championship medallist vawi hnih lo ni tawh, Phogat-i chuan khawlaia an mu lai thlalak Twitter-ah a tar lang.
“Podium atangin khawlaiah! Dikna duhin zanah pawn boruakah,” a ti bawk.