Aizawl: MPCC Treasurer a nihna atanga Zodintluanga Ralte-in bânna a theh luh avanga an party-in harsatna an tawk mek chu an sorkarna tur kawnga harsatna an tawh pakhatah ngai turin MPCC President Lalsawta chuan an party mite chah.
MPCC President Lalsawta hian nimin khan Delhi atanga lo hawin Lengpui Airport-ah Congress party hruaitu thenkhatin an hmuak a. Hemi hnu hian Congress Bhavan-ah amah lawmna hun hman zui a ni.
He hunah Treasurer Zodintluanga’n bânna a theh luh chungchang sawiin Lalsawta hian, “Kan Vice President Pu Lal Thanzara te, kan senior zahawm tak takte nen kan ngaihtuahho ang a. A bânna pawm tur a nih leh nih loh chungchang hi chu kan sawiho ang a, Mizoram mipui hriatah kan la puang ang,” a ti.
Lalsawta chuan, “He harsatna kan tawh mek hi kan sorkarna tur kawnga harsatna an tawh pakhatah i ngai ang u. Heng harsatna hi awm lo turin tawngtai mah ila, harsatna hi a lo thleng tho tho thin,” tia sawiin party dangte ang bawkin harsatna an tawk niin a sawi a. Pathianin rem a tih phawt chuan mipui rawng bawl turin, mi rethei zawkte khaichhuak turin a hung chhuak leh ngei dawn nia a rin tlat thu a sawi bawk.
MPCC president hian. “LMC-ah kan ti tha lo hle a, VC bye-election-ah kan ti tha lo hle bawk. Mahse, Pathian kaihhruaina kawng reng reng hi kawng mam a awm ngai lo. Bible-a Pathian mite kawng reng reng hi nuamsa a awm ngai lo. Beidawn rum rumna tur a tam mai. Pathian hnenah kawng mam i dil lo ang u,” tiin beidawng mai lovin, an tum sorkar tha tihhlawhtlin ngei tumin an kal zel dawn niin a sawi.
India ramah Congress kaihhruai sorkar pianna chance a sang hle tih sawiin Lalsawta hian, “Opposition party lian zawng zawngin Congress kaihhruai sorkar siam duhin hma an la a. Kum 2024-a India rama Lok Sabha inthlanpui lo awm turah Congress sorkar a piang ngei dawn niin a lang,” a ti.
Mizoram chungchang sawiin, “Party dangten ‘Congress hi an dingchhuak tawh dawn lo’ an ti thin. Mahse, khu lama zawmpui nei miah lote pawhin sorkar an tum chuan keini chu hmabak duhawm tak nei kan ni zawk,” a ti bawk.
Congress Bhavan-a Lalsawta puala hun hman hi John Siamkunga, Gen. Secretary-in a kaihruai a ni.