Sorkar laipuia Ministry of New & Renewable Energy (MNRE) leh Mizoram sorkar tangkawpa siam nizung chakna hmanga kawlphetha mega watt 20 (20 MW) pe chhuak thei, Vankal Solar Park chu nimin khan Power & Electricity Minister R. Lalzirliana’n a hawng.
Sorkar thuchhuahin a tar lan danin Vankal Solar Park hi hmarchhaka ni zung chakna hmanga kawlphetha siam chhuahna lian ber, state sorkar sum Rs. nuai 1,707 leh sorkar laipui sum Rs. nuai 400, avaiin Rs. nuai 2,107 senga din a ni a. Civil work atana senso Rs. nuai 272.38 leh electrical work atana senso Rs. nuai 1,834.77 a ni.
August, 2018-ah a lung phum niin hri leng avanga hna a khaihlak avangin a zawh hun tura ruahmanah zawh hman a ni lo va. February 16, 2023 khan hlawhtling taka enchhin niin March 18, 2023-ah commercial operation tih tan a nih thu sorkar thuchhuah chuan a tar lang.
Solar plate bun hna chu M/S Sunfree Northeast Renewable Energy Pvt. Ltd. leh M/S ATA Renewable P4 Pvt. Ltd.-in an thawk a. Hawn a nih atanga kum 25 chhung enkawl hna company hian an thawk zui ang a, power a siam chhuahte chu Mizoram sorkarin Rs 3.94/unit-in a lei thei dawn niin sorkar thuchhuah chuan a tar lang a. Phai lam atanga leina nena khaikhinin sorkarin unit khatah Re. 1 aia tam zel a hum thei dawn a ni.
Vankal Solar Park hi Mizoram puma hman theih tura duan a ni a, ram acre 144-a zauah solar plate/module 52453 bun a ni a, inverter 113, inverter control room pasarih leh main control room pakhat a awm bawk a. Nimin khan Vankal Solar Park hian a chak lai berin power mega watt 19.06 thleng a pe chhuak thei niin sorkar thuchhuah chuan a tar lang.
P&E Minister R. Lalzirliana chuan Vankal Solar Park puitlinna tura ram petu Vankal khawtlang mipuite chhuanawm a tih thu sawiin solar park chu hawn fel ni tawh mah se a venhim leh enkawl zui zel kawngah neitu thinlung pu chhunzawm zel turin a chah a. Thahnemngai taka chhun zana viltu deptt-a thawktute pawh fakin, thawktute zingah awlsam taka sum siam tum an awm a, man chhuah an nih chuan an chungah dan anga hmalak zel a nih tur thu a sawi.
Lengteng bialtu MLA Dr. L. Thangmawia pawhin a bial chhung Vankal khuaa North East-a Solar Park lian leh hmasaber ni tur hawn a ni chu lawmawm a tih thu a sawi bawk a ni.