MNF Media & Publicity department chuan nimin khan Aizawl Press Club-ah thu thar thehdarhtute an kawm a. An General Secretary VL Krosshnehzova chuan Zoram People’s Movement (ZPM) chu sorkar ve hrim hrim châkin an tuihal huam huam avangin tihhreh leh tihduh loh nei ta lo hial niin a puh.
VL Krosshnehzova chuan ZPM chu tha ber leh thianghlim bera insawiah puhin, “Sorkar ve hrim hrim châkin an tui a hal huam huam a. Tih hreh leh tih duh loh an nei ta lo hial niin MNF chuan kan ngai a. An din tirh lama thianghlim ber leh tha bera insawi thinte kha an danglam ta hle. An insawi dan thin leh tuna an thil tihte chu a inpersan ta hle,” a ti.
ZPM hian Chakma ramah ZPM an din loh tur thu pawh an sawi fo a, Chakma candidate nei MNF leh Congress chu Mizo hnam leh Mizoram tlukchhiat pawi ti loah an puh chungin sorkar ve hrim hrim an châk luatah Chakma Autonomous District Council (CADC)-ah ZPM an din ta tih a sawiin, “Hnam chhiatna thlentu tura an puh Chakmate chu fachuam enin an en ta zawk a,” tiin VL Krosshnehzova chuan a sawi.
VL Krosshnehzova chuan thianghlim bera insawi, Chakmate hnam ralna tur an nih thu thlangaupui thintu, Chakma rama ZPM an din ve loh tur thu sawi thintute chuan lal ve hrim hrim an châk luatah an principle an kalsan ta nia sawiin, “An lal hma hauh pawhin an principle an kalsan a, an sawi loh ang hlirin an khawsa ta a ni. Hlawkna an telna tur a nih phawt chuan dawt sawi thin leh an tanna thlak thlak thin an nih hriain ZPM lakah finkhur turin mipuite kan chah a ni,” a ti.
MAY 9, 2023-a CADC inthlan lo awm turah pawh ZPM chuan candidate neih loh hlauin an party hotuten an thutchilh mek nia sawiin VL Krosshnehzova hian a sawi a. An candidate 13 zinga pali – Kusum Lota Chakma – Borapansuri II biala ding, Shanti Jiban Chakma – Chhotapansury biala ding, Onish Moy Chakma – Mondira Sora biala ding, Buddha Lila Chakma – Vaseitlang biala dingte phei chu eiruk thubuai nei lai an nih thu a sawi a. Eirukna thubuai nei lai, pakhat phei chu thiam loh chantir tawh hial candidate an neih duh danah hian ZPM hian an duh thianghlim lovin politics-a an duh tawpzia a tilang chiang hleah an ngaih thu a sawi bawk.